कपिलवस्तु । कपिलवस्तुमा पार्किङ गरिएको ट्रकमा स्कार्पियो ठोक्किँदा दुईजनाको मृत्यु भएको छ । हुलाकी सडकखण्डअन्तर्गत गएराति भएको सवारी दुर्घटनामा थप तीनजना घाइते भएका छन् ।
जिल्लाको कपिलवस्तु नगरपालिका-१२ पिप्रराहवामा रोकिराखेको ट्रकसँग भारतीय नम्बरको स्कारपियो ठोक्किँदा दुर्घटना भएको हो ।
बहादुरगंजबाट तौलिहवातर्फ आउँदै गरेको यूपी ३२ सीए ८३४३ नम्बरको स्कारपियो साइडमा रोकिएको लु १ ख ९५४९ नम्बरको ट्रकमा ठोक्किँदा कपिलवस्तु नगरपालिका-११ का ५० वर्षीय राधेश्याम कुर्मी र शिवराज नगरपालिका-६ का ५५ वर्षीया चिन्नी कुर्मीको मृत्यु भएको जिल्ला प्रहरी कार्यालय कपिलवस्तुका प्रमुख एसपी सन्तोष आचार्यले जानकारी दिए ।
शनिबार साँझ भएको दुर्घटनामा महाराजगञ्ज नगरपालिका-११ का ६५ वर्षीय नन्दप्रसाद दुबे, शिवराज नगरपालिका-१० का २८ वर्षीय मोतिलाल कुर्मी र शिवराज नगरपालिका-११ का २० वर्षीय सुरेश कुर्मी घाइते भएका छन् ।
प्रहरीका अनुसार स्कारपियो अनियन्त्रित भई रोकिराखेको ट्रकमा ठोक्किँदा दुर्घटना भएको हो । घाइतेहरूको स्थानीय अस्पतालमा उपचार भइरहेको छ ।
प्रहरीले दुर्घटनाबारे थप अनुसन्धान भइरहेको जनाएको छ ।
प्रतिक्रिया