काठमाडौं । चलचित्र लालीबजार को प्रदर्शनमा उच्च अदालत पाटनले तत्कालका लागि रोक लगाएको छ । न्यायाधीश प्रकाश ढुंगाना को एकल इजलासले मंगलबार सञ्चार तथा सूचना प्रविधि मन्त्रालयलगायत सम्बन्धित निकायका नाममा अल्पकालीन अन्तरिम आदेश जारी गर्दै वैशाख २२ गतेसम्म चलचित्र प्रदर्शन नगर्न आदेश दिएको हो ।
चलचित्रका केही शब्द र प्रस्तुतिप्रति आपत्ति जनाउँदै बादी समुदायको तर्फबाट रोशनी नेपाली ले वैशाख १४ गते रिट निवेदन दायर गरेकी थिइन् । सो रिटमाथिको प्रारम्भिक सुनुवाइपछि अदालतले अन्तरिम आदेश जारी गरेको हो ।
अदालतले मन्त्रालयसहित सम्बन्धित निकायलाई १५ दिनभित्र कारणसहितको लिखित जवाफ पेस गर्न पनि निर्देशन दिएको छ । साथै, वैशाख २२ गते दुवै पक्षबीच संयुक्त इजलासमा छलफल हुने तय भएको छ । सोही छलफलपछि अन्तरिम आदेशलाई निरन्तरता दिने वा नदिनेबारे अन्तिम निर्णय गरिनेछ ।
यदि अन्तरिम आदेशले निरन्तरता पायो भने रिटको अन्तिम किनारा नलागेसम्म चलचित्र प्रदर्शन रोकिनेछ । निर्देशक यम थापा को निर्देशनमा बनेको यो चलचित्र वैशाख १८ गतेदेखि प्रदर्शन गर्ने तयारीमा थियो ।
चलचित्रमा स्वस्तिमा खड्का, रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, प्रेम पाण्डे र आशा पौडेललगायत कलाकारको अभिनय रहेको छ ।
कार्यकारी निर्माता प्रदीप भट्टराई रहेको यस चलचित्रका निर्माता म्याक्स दीपेश खत्री र रवीन्द्रसिंह बानियाँ हुन् । बादी समुदायका महिलाको कथावस्तुमा आधारित यो चलचित्रप्रति सोही समुदायभित्रै समर्थन र विरोध दुवै देखिएको छ ।
प्रतिक्रिया