काठमाडौं । जल तथा मौसम विज्ञान विभागले आज देशका विभिन्न स्थानमा तीव्र हावाहुरीसहित वर्षाको सम्भावना रहेको भन्दै आवश्यक सतर्कता अपनाउन आग्रह गरेको छ ।
विभागका अनुसार सुदूरपश्चिमदेखि कोशी प्रदेशसम्मका विभिन्न जिल्लामा तीव्र गतिको हावाहुरी चल्ने सम्भावना रहेको छ । विशेषगरी सुदूरपश्चिम प्रदेशका डडेलधुरा र डोटी, लुम्बिनी प्रदेशका बर्दिया, बाँके, दाङ र अर्घाखाँची, मधेस प्रदेशका धनुषा र बारा तथा कोशी प्रदेशको मोरङसहित आसपासका क्षेत्रमा हावाहुरीको जोखिम उच्च रहेको जनाइएको छ ।
मंगलबार जारी सूचनाअनुसार हावाहुरी साँझ करिब ५ः४५ बजेबाट सुरु भई भोलि बिहान करिब ७ः४५ बजेसम्म कायम रहने अनुमान गरिएको छ । पश्चिमबाट पूर्वतर्फ सर्दै जाने मौसम प्रणालीका कारण मेघगर्जन, चट्याङ, हावाहुरी र असिनासहित वर्षा हुने सम्भावना देशका धेरै स्थानमा रहेको विभागले जनाएको छ ।
आज दिउँसो कोशी, मधेस, वाग्मती, गण्डकी र लुम्बिनी प्रदेशका धेरै स्थानमा तथा कर्णाली र सुदूरपश्चिम प्रदेशका केही स्थानमा मेघगर्जन र चट्याङसहित मध्यम वर्षाको सम्भावना छ । साथै, कोशी प्रदेशको पहाडी भूभागका एक-दुई स्थानमा भारी वर्षा हुने सम्भावना पनि रहेको छ ।
राति पनि कोशी, मधेस, वाग्मती र गण्डकी प्रदेशलगायत देशका पहाडी तथा हिमाली क्षेत्रमा अधिकांश बादल लाग्ने तथा तराई क्षेत्रमा आंशिक बदली रहने अनुमान गरिएको छ । यी क्षेत्रमा मेघगर्जन र चट्याङसहित मध्यम वर्षा हुने सम्भावना छ भने केही स्थानमा भारी वर्षा पनि हुन सक्ने विभागले जनाएको छ ।
विभागले हावाहुरी, चट्याङ र वर्षाबाट हुन सक्ने जोखिमलाई मध्यनजर गर्दै सर्वसाधारणलाई सुरक्षित स्थानमा रहन र आवश्यक सावधानी अपनाउन आग्रह गरेको छ ।
प्रतिक्रिया