काठमाडौं । प्रधानमन्त्री बालेन्द्र शाहका राजनीतिक सल्लाहकार असिम शाहले सरकारले सार्वजनिक सेवा प्रवाह र प्रशासनिक प्रणालीमा रहेका नीतिगत जटिलता हटाउन महत्त्वपूर्ण कदम चालेको बताएका छन् ।
बिहीबार सामाजिक सञ्जालमार्फत धारणा सार्वजनिक गर्दै उनले जनसरोकारका निर्णयहरू निश्चित समयसीमाभित्र सम्पादन गरी सुशासनको प्रत्याभूति गराउन अध्यादेश ल्याइएको उल्लेख गरे । “पुराना र जटिल कानुनी प्रावधानका कारण जनहितका कार्यमा हुने ढिलाइलाई यसले अन्त्य गर्नेछ,” उनले भने ।
उनका अनुसार २०८३ वैशाख १४ गते बसेको मन्त्रिपरिषद् बैठकको सिफारिसमा अध्यादेशहरू प्रमाणीकरणका लागि रामचन्द्र पौडेल समक्ष पठाइएको हो ।
शाहले ती अध्यादेशहरू कुनै व्यक्ति वा समूहको स्वार्थका लागि नभई नागरिकको हित र राज्य संयन्त्रको प्रभावकारिता अभिवृद्धिका लागि ल्याइएको दाबी गरे । “कानुनी जटिलताका कारण जनसरोकारका काम रोकिनु हुँदैन भन्ने लोकतान्त्रिक मान्यतालाई आत्मसात गर्दै यसले देशको समृद्धिको यात्रालाई गति दिने आधार तयार पार्नेछ,” उनले सामाजिक सञ्जालमा लेखेका छन् ।
विगतमा दशकौँदेखि अल्झिएका प्रक्रियागत समस्याहरूको पहिचान गरी तिनको दिगो र वैज्ञानिक समाधान निकाल्ने सरकारको लक्ष्य रहेको उनले स्पष्ट पारे ।
प्रतिक्रिया