काठमाडौं । प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङ्देम्बेले रामचन्द्र पौडेलसँग भेटवार्ता गरेका छन्।
शनिबार बिहान शीतल निवास पुगेर भएको उक्त भेटवार्ता करिब एक घण्टा चलेको थियो। भेटमा समसामयिक राजनीतिक विषयमा संवाद हुनुका साथै अध्यादेश सम्बन्धी विषय प्रमुख रूपमा उठाइएको आङ्देम्बेको सचिवालयले जनाएको छ।
भेटका क्रममा आङ्देम्बेले सरकारले अध्यादेशमार्फत शासन चलाउन खोजेको भन्दै त्यसप्रति विपक्षी दलहरूको असहमति राष्ट्रपतिलाई जानकारी गराएका थिए। सरकारले संसद् अधिवेशन आह्वान भइसकेको अवस्थामा समेत अध्यादेशको बाटो रोजेको भन्दै विपक्षीहरूले आपत्ति जनाउँदै आएका छन्।
सरकारले विभिन्न अध्यादेशहरू जारी गर्न राष्ट्रपतिसमक्ष सिफारिस गरेकोमध्ये तीनवटा अध्यादेश जारी भइसकेका छन्। विपक्षी दलहरूले भने यस्ता अध्यादेशहरू फिर्ता लिन आग्रह गर्दै निरन्तर विरोध गरिरहेका छन्।
आङ्देम्बेले विपक्षी दलहरूको साझा धारणा प्रस्तुत गर्दै अध्यादेश जारी नगर्न र संसदीय प्रक्रियालाई प्राथमिकता दिनुपर्ने आवश्यकता औंल्याएका थिए।
प्रतिक्रिया