प्रदेश संरचना र जिसस खारेज गर्न गोकुल बास्कोटाको सुझाव

काठमाडौं । नेकपा एमालेका नेता गोकुलप्रसाद बास्कोटाले प्रदेश संरचना तथा जिल्ला समन्वय समिति (जिसस) खारेज गर्नुपर्ने धारणा सार्वजनिक गरेका छन् । सरकारले संविधान संशोधनको गृहकार्य गरिरहेका बेला नेता बास्कोटाले सामाजिक सञ्जाल फेसबुकमार्फत केन्द्र र स्थानीय तह (पालिका) मात्र रहने गरी संरचना पुनःव्यवस्थित गर्न सुझाव दिएका हुन् ।

उनले लेखेका छन्, “पहिला रास्वपाले संघीयता खारेजको कुरा गर्थ्यो, अब संविधान संशोधन गर्ने कि नगर्ने ? गर्ने हो भने केन्द्र र पालिका मात्र होस् ।”

बास्कोटाले राष्ट्रिय सभालाई १०५ सदस्यीय बनाउँदै महिला र पुरुषको ५०-५० प्रतिशत प्रतिनिधित्व सुनिश्चित गर्नुपर्ने प्रस्ताव पनि अघि सारेका छन् । साथै उपराष्ट्रपतिलाई राष्ट्रिय सभाको अध्यक्ष बनाउने व्यवस्था गर्नुपर्ने उनको सुझाव छ ।

त्यस्तै, उनले प्रतिनिधिसभाको समानुपातिक निर्वाचन प्रणाली खारेज गरी प्रत्यक्ष निर्वाचनमा महिला-पुरुषको ४०-६० प्रतिशत अनिवार्य प्रतिनिधित्व सुनिश्चित गर्नुपर्ने बताएका छन् ।

उनले फेसबुकमा लेखेका छन्, “राष्ट्रियसभा १०५ सिट, पूर्ण समावेशी, महिला-पुरुष ५०-५० प्रतिशत, उपराष्ट्रपति नै सभाध्यक्ष हुने व्यवस्था होस् । प्रतिनिधिसभाको समानुपातिक सिट खारेज गरी प्रत्यक्षमा महिला-पुरुष ४०-६० प्रतिशत अनिवार्य गरिनुपर्छ । जिसस आवश्यक छैन ।”