काठमाडौं । श्रम संस्कृति पार्टीका अध्यक्ष हर्क साम्पाङ र पूर्वमन्त्री सुदन किरातीबीच पार्टी एकताका लागि सैद्धान्तिक सहमति भएको छ ।
दुवै नेताबीच विभिन्न चरणमा भएको छलफलपछि गएराति एकताको सहमति जुटेको बताइएको छ । सहमतिअनुसार सुदन किरातीलाई पार्टीको वरिष्ठ नेताको जिम्मेवारी दिइने जनाइएको छ ।
एकतासम्बन्धी औपचारिक जानकारी आज दिउँसो ३ बजे काठमाडौंको बागबजारस्थित हार्दिक होटलमा आयोजित पत्रकार सम्मेलनमार्फत सार्वजनिक गरिने सुदन किरातीका सहयोगी हेमन्त किरातीले जानकारी दिए ।
दुवै पक्षबीच वैचारिक तथा सैद्धान्तिक विषयमा थप छलफल भने जारी रहेको बताइएको छ ।
पूर्व माओवादी नेता रहेका किराती नेकपा माओवादी केन्द्र र नेकपा एकीकृत समाजवादीबीच पार्टी एकता भई नेपाली कम्युनिष्ट पार्टी गठन भएपछि जनार्दन शर्मा नेतृत्वको प्रगतिशील लोकतान्त्रिक पार्टी (प्रलोपा)मा प्रवेश गरेका थिए ।
प्रतिनिधिसभा निर्वाचनपछि भने उनले गत फागुन २१ गते प्रलोपाको साधारण सदस्यता त्यागेका थिए । त्यतिबेला उनी पार्टीको पाँच सदस्यीय अध्यक्ष परिषद्का सदस्यसमेत रहेका थिए ।
प्रतिक्रिया