खजुरा । बाँकेको सामुदायिक विद्यालय मध्यको अब्बल मानिएको खजुराको ज्ञानोदय नमुना माध्यामिक विद्यालयबाट यस वर्षको एसईईमा ८३.९३ प्रतिशत विद्यार्थी ग्रेडेड भएका छन् । सोमबार प्रकाशित एसईईको नतिजामा ज्ञानोदयबाट १ जना ४ जिपिए सहित १४१ जना विद्यार्थी ग्रेडेड भएका हुन् ।
साधारण र प्राबिधिक गरि १६८ जना विद्यार्थीले एसईई परीक्षामा सहभागिता जनाएकोमा २७ जना विद्यार्थी भने ननग्रेडेड बन्न पुगेका छन् । ज्ञानोदयकी झरना न्यौपानेले ४ जिपिए ल्याउन सफल भएकी ज्ञानोदय नमुना माबिका प्रधानाध्यापक ऋषिराम सापकोटाले जानकारी दिए ।
ज्ञानोदयबाट ८ जना ए प्लस, २८ जना ए तथा ७२ जनाले बि प्लस स्तरको ग्रेड प्राप्त गर्न सफल भएको प्रअ सापकोटाले बताए । जस अन्तर्गत साधारण तर्फ २ जना ए प्लस, १८ जना ए, ५१ जना बि प्लस र २७ जना बि ग्रेड प्राप्त गरेका छन् भने प्राबिधिक तर्फ ६ जना ए प्लस, १० जना ए, २१ जना बि प्लस र ६ जना बि ग्रेड प्राप्त गरेका छन् ।
२०७३ सालदेखि ज्ञानोदय माविले प्राविधिक तथा व्यावसायिक धारअन्तर्गत सिभिल इन्जिनियरिङ विषयमा कक्षा ९ देखि १२ सम्म पढाइ सञ्चालन गर्दै आएको छ । २०३४ सालमा स्थापना भएको ज्ञानोदय मावि तत्कालीन मध्यपश्चिमाञ्चल विकास क्षेत्र, हालको लुम्बिनी प्रदेश र बाँके जिल्लास्तरमा पटक–पटक उत्कृष्ट विद्यालयको रूपमा पुरस्कृत भएको छ ।
प्रतिक्रिया