संसदमा प्रधानमन्त्री बालेन्द्रको खोजी, रुलिङ गरेर बोलाउन प्रमुख प्रतिपक्षको माग

काठमाडौं । प्रमुख प्रतिपक्षी दल नेपाली कांग्रेसले प्रतिनिधिसभा बैठकमा प्रधानमन्त्री वालेन्द्र शाह अनुपस्थित भएको भन्दै आपत्ति जनाएको छ।

बुधबार बसेको प्रतिनिधिसभा बैठकको आकस्मिक समयमा कांग्रेसका सचेतक निश्कल राईले प्रधानमन्त्रीलाई सदनमा उपस्थित गराउन सभामुखसँग रुलिङको माग गरेका हुन्।

राईले नीति तथा कार्यक्रममाथिको छलफलका क्रममा सांसदहरूले उठाएका प्रश्नको जवाफ प्रधानमन्त्रीले दिनुपर्ने भए पनि उनी सदनमा उपस्थित नभएको बताए। “आज पनि अवस्था उस्तै छ। मैले प्रधानमन्त्री देखेको छैन। नीति तथा कार्यक्रममा उठेका प्रश्नको जवाफ दिने कार्यसूची छ, तर प्रधानमन्त्रीलाई सदनमा देख्न सकेनौँ,” उनले भने।

राईले संसदको गरिमा कायम राख्ने जिम्मेवारी सभामुखको भएको उल्लेख गर्दै प्रधानमन्त्रीलाई तत्काल सदनमा बोलाउन आग्रह गरे। “सदनको इज्जत राख्ने भूमिका सभामुखको हो। हजुर हाम्रो नायक हो, तत्काल रुलिङ गरेर प्रधानमन्त्रीलाई सभामा बोलाइदिनुहोस्,” उनले भने।

राईले मंगलबार कांग्रेस संसदीय दलका नेताले प्रधानमन्त्रीको स्वास्थ्य अवस्थाबारे जानकारी गराउन माग गरेको स्मरणसमेत गराए।