प्रधानमन्त्री बालेन्द्रको राजीनामा माग गर्दै संसद अवरोध

काठमाडौं । प्रतिनिधिसभा बैठकमा प्रधानमन्त्री बालेन्द्र शाहको राजीनामा माग गरिएको छ।

सरकारको आगामी आर्थिक वर्षको नीति तथा कार्यक्रममाथिको छलफलमा प्रधानमन्त्री स्वयं उपस्थित नभएको भन्दै विपक्षी दलका सांसदहरूले तीव्र विरोध जनाएका हुन्।

बुधबारदेखि सुरु भएको नीति तथा कार्यक्रममाथिको छलफलमा प्रधानमन्त्रीको तर्फबाट अर्थमन्त्री स्वर्णिम वाग्लेलाई प्रस्ताव पेस गर्न सभामुख डीपी अर्यालले अनुमति दिएपछि विपक्षी सांसदहरू आक्रोशित बनेका थिए।

विपक्षी सांसदहरूले प्रधानमन्त्री संसद्प्रति जिम्मेवार हुनुपर्ने भन्दै उनी अनुपस्थित रहनु अस्वीकार्य भएको बताएका छन्। श्रम संस्कृति पार्टीका हर्क साम्पाङले प्रधानमन्त्री असक्षम भएको आरोप लगाउँदै तत्काल राजीनामा दिन माग गरेका छन् ।

प्रधानमन्त्री उपस्थित नभएको विषयलाई लिएर विपक्षी सांसदहरूले बैठक अवरुद्ध गर्दै नाराबाजी गरेका छन्। यस क्रममा सभामुख र विपक्षी सांसदहरूबीच केहीबेर सवाल(जवाफसमेत भएको छ ।

आजको बैठकमा सरकारको नीति तथा कार्यक्रममाथि छलफल सुरु गर्ने कार्यसूची रहेको छ। प्रधानमन्त्रीको अनुपस्थितिलाई लिएर उत्पन्न विवादका कारण प्रतिनिधिसभाको बैठक तनावपूर्ण बनेको छ।