काठमाडौं । केन्द्रीय चलचित्र जाँच समिति (सेन्सर बोर्ड) को सदस्यमा चलचित्र निर्देशक मनोज पण्डित नियुक्त भएका छन् । सूचना तथा सञ्चारमन्त्री विक्रम तिमिल्सिनाले पण्डितलाई समितिको सदस्यमा नियुक्त गरेका हुन् ।
सरकारले केही दिनअघि ल्याएको अध्यादेशका कारण सेन्सर बोर्डका तीन जना सदस्य पदमुक्त भएका थिए । सोही रिक्त पदमध्ये एकमा पण्डितलाई नियुक्त गरिएको मन्त्रालय स्रोतले जनाएको छ ।
मन्त्रालयका अनुसार पण्डितले नियुक्तिपत्र बुझिसकेका छन् । बाँकी दुई सदस्य पदमा भने नियुक्तिको प्रक्रिया जारी रहेको मन्त्रालयका प्रवक्ता रानामगरले जानकारी दिए ।
सरकारले गत साता ल्याएको अध्यादेशपछि यसअघि नियुक्त तीन सदस्य पदमुक्त भएका थिए । त्यसपछि रिक्त रहेका पदहरूमा नयाँ नियुक्ति प्रक्रिया अघि बढाइएको हो ।
लामो समयदेखि चलचित्र निर्देशन क्षेत्रमा सक्रिय पण्डित अघिल्लो सरकारले ल्याएको चलचित्र विधेयकको विरोधमा पनि अग्रपंक्तिमा रहेका थिए ।
प्रतिक्रिया