काठमाडौं । नेपाल बार एसोसिएसनले सर्वोच्च अदालत प्रशासनले रिट तथा निवेदन दर्ता गर्न अस्वीकार गरेको विरोधमा आज दिउँसै लालटिन बालेर प्रदर्शन गर्ने निर्णय गरेको छ । सोमबार कामु प्रधानन्यायाधीश सपना मल्ल प्रधानसँग भेटवार्ता गरेपछि बसेको बारको बैठकले सर्वोच्च अदालत प्रशासनबाट ‘अनपेक्षित क्रियाकलाप र हर्कत’ भएको निष्कर्ष निकाल्दै विरोध कार्यक्रम घोषणा गरेको हो ।
बारका महासचिव केदार कोइरालाका अनुसार नेपाल बार परिसरमा कानुन व्यवसायीहरूको सहभागितामा न्याय, विवेक र स्वच्छ प्रक्रियाको खोजी गर्दै विरोध प्रदर्शन गरिनेछ । बारले सर्वोच्च अदालतमा दर्ता हुन आएका रिट निवेदनहरू प्रशासनले दर्ता नगरी दरपीठ गरेर फर्काएको भन्दै यसले न्याय प्राप्तिको मार्गमा अवरोध सिर्जना गरेको ठहर गरेको छ ।
संविधानको धारा १३६, न्याय प्रशासन ऐन, २०७३ को दफा ३५ तथा सर्वोच्च अदालत नियमावली, २०७४ को नियम ७ र ८ अनुसार कामु प्रधानन्यायाधीशले दरपीठ उपरको निवेदन दर्ता गर्न आदेश दिए पनि प्रशासनले त्यसको पालना नगरेको बारको आरोप छ । यसै विषयलाई लिएर प्रतिनिधिसभामा केही सांसदहरूले गरेको टिप्पणीप्रति पनि बारले गम्भीर ध्यानाकर्षण भएको जनाएको छ ।
बारद्वारा जारी निर्णयमा उल्लेख गरिएको छ, “मिति २०८३ जेठ ५ गते दिनको १ः१५ बजे नेपाल बार परिसरमा लालटिन बालेर अदालत प्रशासनको अनपेक्षित गतिविधिको विरोधसहित न्याय, विवेक र स्वच्छ प्रक्रियाको खोजी गरिनेछ ।”
बारले दरपीठ गरिएको निवेदन विनाकारण दर्ता नगर्नु प्रशासनको अधिकार क्षेत्रभन्दा बाहिरको कार्य भएको र यसले न्यायिक प्रक्रियामै अवरोध पुर्याएको जनाएको छ ।
यस्तै, न्याय प्रशासनको अन्तिम जिम्मेवारी वहन गर्ने कामु प्रधानन्यायाधीशको आदेशसमेत कार्यान्वयन नगर्नु प्रशासनको ‘असाधारण र अप्राकृतिक’ रवैया भएको बारको टिप्पणी छ ।
बारले अदालतमा विचाराधीन विषयमा संसद्मा छलफल गर्न रोक लगाउने संविधानको धारा १०५ लाई समेत बेवास्ता गरिएको जनाएको छ ।
साथै, संसदीय अभिलेखबाट आपत्तिजनक अभिव्यक्ति हटाउन र यस्ता घटना पुनः नदोहोरिने सुनिश्चित गर्न सभामुख डोलप्रसाद अर्यालको ध्यानाकर्षण गराइएको बारले जनाएको छ ।
नेपाल बार एसोसिएसनले आवश्यक परे आफ्ना सल्लाहकार तथा विभिन्न इकाइबाट प्राप्त सुझावका आधारमा थप आन्दोलनका कार्यक्रम सार्वजनिक गर्ने पनि जनाएको छ ।
प्रतिक्रिया