नेपालगन्ज । संघीय सरकारले घोषणा गरेको दुईदिने सार्वजनिक बिदालाई बाँकेको खजुरा गाँउपालिकाले शुक्रबार र शनीबार बिदा दिने गरि निर्णय गरेको छ । संघीय सरकारले शनिबार र आइतबार सार्वजनिक बिदा दिने निर्णय गरेपनि खजुरा गाँउपालिकाले भने शुक्रबार र शनिबार बिदा दिने निर्णय गरेको हो ।
पालिकाले शुक्रबार र शनिबारको बिदा शैक्षिक क्षेत्रमा मात्र लागु हुने स्पष्ट पारेको छ । पालिका अन्तर्गतका सबै बिद्यालयहरुलाई निर्देशन जारी गर्दै खजुरा गाँउपालिकाले शुक्रबारका दिन अधिकांस बिद्यालयका मुस्लिम समुदायका विद्यार्थीहरु नमाज पढ्न जानुपर्ने भएका कारण आइतबारको सट्टा शुक्रबार बिदा दिन निर्देशन दिएको छ । खजुरा गाँउ शिक्षा समितिको निर्णयानुसार शुक्रबार र शनिबार बिदा दिने निर्देशन जारी गरिएको पालिकाका शिक्षा शाखा प्रमुख खगेन्द्र बहादुर मल्लले जानकारी दिए ।
‘मन्त्रिपरिषदको मिति २०८२/१२/२२ गतेको निर्णयानुसार शैक्षिक सत्र २०८३ मा शैक्षिक संस्थाहरुमा हसामा २ दिन शनिवार र आइतवार सार्वजनिक विदा दिने निर्णय भएको जानकारी प्रास भएकोमा खजुरा गाउँ शिक्षा समितिको मिति २०८३/०२/०४ गतेको निर्णयानुसार सामुदायिक र संस्थागत विद्यालयहरुका समेत मुस्लिम धर्मालम्वीहरुका बालबालिकाहरु शुक्रवार अनिवार्य नमाजमा सहभागि हुन जाने कारण शुक्रबार नियमित पठनपाठनमा प्रभाव परेको कारण खजुरा गाउँपालिकामा सञ्चालित सम्पूर्ण विद्यालयहरुले हप्तामा दुई दिन शुक्रबार र शनिवार सार्वजनिक विदा गर्ने र आइतबार देखि विहीवारसम्म नियमित अध्ययन अध्यापनको व्यवस्था कार्यान्वयन सम्बन्धमा थप निर्देशन पठाइएको छ ।’ कार्यपालिकाले जारी गरेको निर्देशनमा लेखिएको छ ।
पालिकाले शिक्षा तथा मानव स्रोत विकास केन्द्रको निर्देशन कार्यायन्वयनको बुदा १ देखि ६ सम्मको व्यवस्था समेत कार्यान्वयनको लागि सम्पूर्ण विद्यालयहरुलाई थप निर्देशन गरिएको जनाएको छ ।
प्रतिक्रिया