बुटवल । नेपाल खेलकुद महासंघ रुपन्देहीको आयोजनामा आगामी जेठ १५ र १६ गते दोस्रो संस्करणको जिल्ला स्तरीय खुला पुरुष डोरी तान (टग अफ वार) प्रतियोगिता आयोजना हुने भएको छ ।
लोप हुँदै गएको परम्परागत खेलको संरक्षण तथा प्रवर्द्धन गर्दै खेलाडीहरूको प्रतिभा प्रस्फुटन गराउने उद्देश्यसहित प्रतियोगिता सञ्चालन गर्न लागिएको आयोजकले जनाएको छ ।
प्रतियोगिता बुटवल उपमहानगरपालिका–१० रामनगरस्थित रामनगर खेल मैदानमा सञ्चालन हुनेछ ।
नेपाल खेलकुद महासंघ रुपन्देहीका अध्यक्ष समुन्द्र श्रेष्ठका अनुसार प्रतियोगिताको विजेताले नगद ६० हजार ६६६ रुपैयाँ प्राप्त गर्नेछन् । त्यसैगरी उपविजेताले ३० हजार ३३३ रुपैयाँ तथा तृतीय हुने टोलीले १५ हजार १११ रुपैयाँ पुरस्कार पाउनेछन् ।
प्रतियोगितामा रुपन्देही जिल्लाभित्र रहेका इच्छुक क्लब, संघसंस्था तथा समूहहरूले सहभागिता जनाउन सक्ने आयोजकले जनाएको छ ।
आयोजक संस्थाका उपाध्यक्ष तथा कार्यक्रम संयोजक सरोज क्षेत्रीका अनुसार प्रत्येक टोलीमा ८ जना खेलाडी, १ जना रिजर्भ खेलाडी, १ जना प्रशिक्षक र १ जना टिम म्यानेजर गरी कुल ११ जना सहभागी हुन पाउने व्यवस्था गरिएको छ ।
उनले एक टोलीको कुल तौल बढीमा ६४० केजीभित्र हुनुपर्ने नियम बनाइएको जानकारी दिए ।
प्रतियोगितामा सहभागी खेलाडीहरूले आफ्नो पालिका खुल्ने परिचय विवरणसहित मैदानमा उपस्थित हुनुपर्ने तथा टिम दर्ताका लागि दुई हजार रुपैयाँ शुल्क लाग्ने आयोजकले जनाएको छ ।
महासंघका सदस्य इप्पल भण्डारीका अनुसार प्रतियोगितामा १६ भन्दा बढी टोलीको सहभागिता रहने अनुमान गरिएको छ ।
गत वर्ष सम्पन्न पहिलो संस्करणमा तिलोत्तमा फिटनेस सेन्टर विजेता बनेको थियो ।
प्रतिक्रिया