काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले मानव अधिकार आयोगले सार्वजनिक गरेको प्रतिवेदन तत्काल कार्यान्वयनमा लैजान सरकारसँग आग्रह गरेका छन्।
राप्रपा स्थापना दिवसको ३६औँ वर्ष प्रवेशको अवसरमा शुक्रबार काठमाडौंमा आयोजित कार्यक्रममा बोल्दै अध्यक्ष लिङ्देनले यस्तो आग्रह गरेका हुन् । उनले आयोगले दोषी ठहर गरेका व्यक्तिहरूले पनि आवश्यक कानुनी प्रक्रिया पूरा गरी यथाशीघ्र सफाइ लिनुपर्ने बताएका छन्।
राप्रपा स्थापना दिवसको ३६औँ वर्ष प्रवेशको अवसरमा शुक्रबार काठमाडौंमा आयोजित कार्यक्रममा बोल्दै अध्यक्ष लिङ्देनले मानव अधिकार आयोगको प्रारम्भिक प्रतिवेदन अत्यन्त महत्वपूर्ण रहेको उल्लेख गरे। प्रतिवेदनले विभिन्न विषय उजागर गरेको भन्दै त्यसलाई कार्यान्वयन गर्ने दिशामा सरकार अग्रसर हुनुपर्ने उनको भनाइ थियो।
उनले आयोगको प्रतिवेदन नेपालभित्र मात्र सीमित नरहने र संयुक्त राष्ट्रसंघ तथा त्यससँग आबद्ध अन्तर्राष्ट्रिय मानव अधिकारसम्बन्धी निकायहरूको अभिलेखमा समेत रहने भएकाले यसलाई गम्भीरतापूर्वक लिन आवश्यक रहेको बताए। प्रतिवेदनमा दोषीका रूपमा उल्लेख गरिएका व्यक्तिहरूले आवश्यक प्रक्रिया पूरा गरी छिटोभन्दा छिटो आफ्नो सफाइ प्रस्तुत गर्नुपर्नेमा उनले जोड दिए।
अध्यक्ष लिङ्देनले विगतमा मानव अधिकार उल्लंघनका घटनामा दोषी ठहरिएका व्यक्तिहरूमाथि विभिन्न देशहरूले विदेश भ्रमणमा प्रतिबन्ध लगाएका उदाहरणहरू रहेको स्मरण गराउँदै यस्तो विषयले अन्तर्राष्ट्रिय प्रभाव समेत पार्न सक्ने बताए। त्यसैले सरकार र सम्बन्धित पक्षहरूले प्रतिवेदन कार्यान्वयन तथा आवश्यक कानुनी प्रक्रियालाई प्राथमिकताका साथ अघि बढाउनुपर्ने उनको धारणा थियो।
प्रतिक्रिया