जनकपुर । महोत्तरीमा डाँका चोरीमा संलग्न समूहले गोली प्रहार गर्दा दुई जना घाइते भएका छन् । महोत्तरीको सोनमा गाउँपालिका–३ खखनास्थित रामविश्वास यादवको घरमा मंगलबार राति डाँका चोरी भएको प्रहरीले जनाएको छ ।
घटनाका क्रममा डाँका समूहले गोली प्रहार गर्दा घरधनीका ज्वाइँ ईश्वर यादव र छोरी किरण यादव घाइते भएको जिल्ला प्रहरी कार्यालय महोत्तरीका प्रवक्ता प्रहरी नायब उपरीक्षक (डीएसपी) पञ्चलाल गोलेले जानकारी दिए ।
घाइते दुवैजनाको जनकपुरस्थित जानकी हेल्थ केयरमा उपचार भइरहेको छ । उनीहरूको स्वास्थ्य अवस्था सामान्य रहेको बताइएको छ ।
प्रहरीका अनुसार घटनाबारे जानकारी बुधबार बिहान प्राप्त भएको हो । घटनामा संलग्न व्यक्तिहरुको खोजी तथा थप अनुसन्धान भइरहेको जिल्ला प्रहरी कार्यालय महोत्तरीले जनाएको छ ।
प्रतिक्रिया