काठमाडौं । साफ महिला च्याम्पियनसिप २०२६ अन्तर्गत आज हुने सेमिफाइनल खेलमा नेपालले बंगलादेशको सामना गर्दैछ । समूह चरणमा उत्कृष्ट प्रदर्शन गर्दै नेपाल समूह ‘ए’ को विजेताका रूपमा अन्तिम चारमा पुगेको हो ।
भारतको गोवास्थित पण्डित जवाहरलाल नेहरू रंगशालामा सम्पन्न समूह चरणको अन्तिम खेलमा नेपालले श्रीलंकालाई २-० गोल अन्तरले पराजित गरेको थियो । नेपालका लागि रश्मीकुमारी घिसिङले पहिलो हाफको इन्जुरी समयमा गोल गरिन् भने कप्तान रेनुका नगरकोटीले ६० औँ मिनेटमा अर्को गोल थपेकी थिइन् ।
यसअघि पहिलो खेलमा नेपालले भुटानलाई १-० ले हराएको थियो । लगातार दुई जितसँगै ६ अंक जोडेको नेपाल समूहको शीर्ष स्थानमा रहँदै सेमिफाइनलमा प्रवेश गरेको हो ।
प्रतियोगिताको समूह ‘बी’ बाट बंगलादेश सेमिफाइनलमा पुगेको हो । आयोजक भारत, बंगलादेश र माल्दिभ्स रहेको उक्त समूहबाट शीर्ष दुई टोली अन्तिम चारमा पुगेका छन् ।
साफ महिला च्याम्पियनसिपको इतिहासमा नेपाल पटक-पटक फाइनल पुगे पनि उपाधि जित्न भने सफल हुन सकेको छैन । यसपटक भने पहिलो पटक उपाधि जित्ने लक्ष्यसहित नेपाली टोली मैदानमा उत्रिएको छ ।
नेपाल र बंगलादेशबीचको सेमिफाइनल खेल नेपाली समयअनुसार दिउँसो ४ः१५ बजे सुरु हुनेछ । खेलको प्रत्यक्ष प्रसारण ‘डीजीओ’ एपमार्फत हेर्न सकिने अखिल नेपाल फुटबल संघ (एन्फा) ले जनाएको छ ।
प्रतिक्रिया