काठमाडौं । दक्षिण एसियाली फुटबल महासंघ (साफ) महिला च्याम्पियनसिपअन्तर्गत नेपाल र बंगलादेशबीच जारी सेमिफाइनल खेलको पहिलो हाफ १-१ को बराबरीमा सकिएको छ ।
भारतको गोवास्थित जवाहरलाल नेहरू रंगशालामा जारी खेलमा नेपालले २३औँ मिनेटमा अग्रता लिएको थियो । दीपा शाहीले लिएको कर्नरमा सिर्जना भएको अवसरलाई सदुपयोग गर्दै गीता रानाले गोल गर्दै नेपाललाई सुरुआती अग्रता दिलाएकी हुन् ।
तर पहिलो हाफको इन्जुरी समयमा बंगलादेशले खेल बराबरीमा ल्यायो। रितु पोर्ना चक्माले प्रहार गरेको कर्नर सिधै गोलमा परिणत भएपछि बंगलादेशले १–१ को बराबरी कायम गरेको हो ।
खेलमा नेपालले थप गोल गर्ने केही उत्कृष्ट अवसर पनि सिर्जना गरेको थियो । ३४औँ मिनेटमा दीपाकै कर्नरमा रश्मीकुमारी घिसिङले गरेको हेडरलाई बंगलादेशकी गोलकिपर मिली अख्तरले नियन्त्रणमा लिएकी थिइन् ।
यस्तै ३६औँ मिनेटमा नेपालले अग्रता दोब्बर बनाउने सुनौलो अवसर गुमायो । प्रीति राईको शक्तिशाली प्रहार क्रसबारमा लागेर फर्किएपछि नेपाल गोल थप्नबाट वञ्चित भएको थियो ।
दुवै टोली फाइनल प्रवेशको लक्ष्यसहित मैदानमा उत्रिएका छन् । दोस्रो हाफमा खेलको नतिजा आफ्नो पक्षमा पार्न नेपालले आक्रामक खेल प्रस्तुत गर्ने अपेक्षा गरिएको छ ।
प्रतिक्रिया