काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले भारतीय प्रधानमन्त्री नरेन्द्र मोदीसँग भेटवार्ता गरेका छन् । भारत भ्रमणमा रहेका लामिछानेले बुधबार नयाँदिल्लीमा प्रधानमन्त्री मोदीसँग भेट गरेका हुन् ।
दुई नेताबीच एक्लाएक्लै भेटवार्ता भएको जनाइएको छ । भेटवार्तामा नेपाल-भारत सम्बन्ध, आपसी हितका विषय, लोकतान्त्रिक अभ्यास, विकास सहकार्य तथा दुई देशबीचको जनस्तरको सम्बन्धका विषयमा छलफल भएको स्रोतले जनाएको छ ।
लामिछाने भारतीय जनता पार्टी (भाजपा) को निमन्त्रणामा भारत भ्रमणमा छन् । भ्रमणका क्रममा उनले यसअघि भारतका विदेशमन्त्री एस. जयशंकर, गृहमन्त्री अमित शाह तथा भाजपा नेतृत्वसँग समेत भेटवार्ता गरिसकेका छन् ।
रास्वपाका अनुसार भ्रमणको मुख्य उद्देश्य नेपाल-भारत सम्बन्धलाई थप सुदृढ बनाउनु, लोकतान्त्रिक मूल्य-मान्यतासम्बन्धी अनुभव आदानप्रदान गर्नु तथा राजनीतिक तहमा संवाद विस्तार गर्नु रहेको छ ।
लामिछाने नेतृत्वको भ्रमण टोलीमा रास्वपाका सहमहामन्त्री विपिनकुमार आचार्य र सचिवालय सदस्य दीपक बोहरालगायत सहभागी छन् । टोली जेठ २२ गते स्वदेश फर्कने कार्यक्रम रहेको छ ।
प्रतिक्रिया