काठमाडौं । दक्षिण एसियाली फुटबल महासंघ (साफ) महिला च्याम्पियनसिपको सेमिफाइनलमा अन्तिम समयमा गोल खाँदा नेपाल बंगलादेशसँग २-१ ले पराजित भएको छ । बुधबार भारतको गोवास्थित जवाहरलालनेहरू रंगशालामा भएको प्रतिस्पर्धात्मक खेलमा अग्रता जोगाउन नसक्दा नेपाल उपाधि यात्राबाट बाहिरिएको हो ।
नेपालले खेलको २३ औँ मिनेटमा अग्रता लिएको थियो । दीपा शाहीको कर्नरबाट सिर्जना भएको अवसरमा गीता रानाले गोल गर्दै नेपाललाई सुरुआती अग्रता दिलाएकी थिइन् ।
तर पहिलो हाफको इन्जुरी समयमा बंगलादेशकी रितु पोर्ना चक्माले कर्नर प्रहारमार्फत सिधै गोल गर्दै खेल १-१ को बराबरीमा ल्याइन् ।
दोस्रो हाफमा दुवै टोलीले केही राम्रा अवसर सिर्जना गरे पनि गोल गर्न सकेनन् । नेपालका लागि ३४औँ मिनेटमा रश्मीकुमारी घिसिङको हेडरलाई बंगलादेशकी गोलरक्षक मिली अख्तरले नियन्त्रणमा लिएकी थिइन् भने ३६ औँ मिनेटमा प्रीति राईको शक्तिशाली प्रहार क्रसबारमा लागेर फर्किएको थियो ।
यस्तै, ६९ औँ मिनेटमा सरु लिम्बूको प्रहार गोलपोस्ट नजिकैबाट बाहिरिँदा नेपालले पुनः अग्रता लिने अवसर गुमायो । ७९औँ मिनेटमा कप्तान तथा गोलरक्षक एन्जिला तुम्बाप्पो सुब्बाले उत्कृष्ट बचाउ गर्दै टोलीलाई संकटबाट जोगाएकी थिइन् ।
तर खेलको इन्जुरी समयमा सागोरिकाले शामसुन्नाहरको क्रसलाई सदुपयोग गर्दै निर्णायक गोल गरेपछि बंगलादेशले २-१ को जित निकाल्दै फाइनलमा स्थान सुरक्षित गर्यो ।
यस हारसँगै साफ महिला च्याम्पियनसिपको इतिहासमा नेपाल दोस्रो पटक फाइनल पुग्न असफल भएको छ । यसअघि सन् २०१६ मा पनि नेपाल फाइनलमा पुग्न सकेको थिएन ।
पछिल्ला दुई संस्करणको विजेता बंगलादेश भने लगातार तेस्रो तथा समग्रमा चौथोपटक फाइनलमा पुगेको छ । अब बंगलादेशले उपाधिका लागि भारत र भुटानबीचको दोस्रो सेमिफाइनलको विजेतासँग प्रतिस्पर्धा गर्नेछ ।
प्रतिक्रिया