काठमाडौं । परराष्ट्रमन्त्री शिशिर खनाल आज (शुक्रबार) औपचारिक भ्रमणका लागि भारत प्रस्थान गर्दैछन् । परराष्ट्र मन्त्रालयले बिहीबार वक्तव्य जारी गर्दै मन्त्री खनालको भारत भ्रमणबारे जानकारी दिएको हो ।
यसअघि जेठ २३ गतेका लागि तय गरिएको भ्रमण केही प्राविधिक कारणले सामान्य रूपमा पुनः तालिका मिलाइएको मन्त्रालयले जनाएको छ । नयाँ कार्यतालिकाअनुसार मन्त्री खनाल शुक्रबार नयाँदिल्ली प्रस्थान गर्नेछन् ।
भ्रमणका क्रममा उनले भारतीय विदेशमन्त्री एस. जयशंकरसहित भारत सरकारका उच्चपदस्थ अधिकारीहरूसँग भेटवार्ता गर्ने कार्यक्रम रहेको छ । भेटवार्तामा नेपाल-भारत सम्बन्धका विविध आयाम, द्विपक्षीय सहकार्य तथा साझा हितका विषयमा छलफल हुने बताइएको छ ।
परराष्ट्र मन्त्रालय स्रोतका अनुसार भ्रमणका क्रममा प्रधानमन्त्री वालेन्द्र शाह (बालेन) को सम्भावित भारत भ्रमणबारे पनि भारतीय पक्षसँग प्रारम्भिक संवाद हुने अपेक्षा गरिएको छ । त्यसका साथै व्यापार, लगानी, ऊर्जा, कनेक्टिभिटी तथा दुई देशबीचका कूटनीतिक सम्बन्धलाई थप सुदृढ बनाउने विषयमा पनि छलफल केन्द्रित रहनेछ ।
स्रोतका अनुसार नेपाल-भारत सीमा विवादलगायत द्विपक्षीय चासोका विषयहरू पनि छलफलको एजेन्डामा पर्न सक्नेछन् । यिनै छलफलका आधारमा आगामी दिनमा प्रधानमन्त्री बालेनको सम्भावित भारत भ्रमणका एजेन्डा तय गरिने बताइएको छ ।
यसअघि राष्ट्रिय स्वतन्त्र पार्टीका सभापति रवि लामिछाने नेतृत्वको प्रतिनिधिमण्डलले भारत भ्रमणका क्रममा भारतीय प्रधानमन्त्री नरेन्द्र मोदीसहित उच्च राजनीतिक नेतृत्वसँग भेटवार्ता गरिसकेको छ । त्यसको निरन्तरताका रूपमा परराष्ट्रमन्त्री खनालको भ्रमणलाई पनि महत्त्वपूर्ण कूटनीतिक पहलका रूपमा हेरिएको छ ।
परराष्ट्र मन्त्रालयले नियमित उच्चस्तरीय भ्रमण आदानप्रदानले नेपाल-भारतबीचको ऐतिहासिक, सांस्कृतिक र बहुआयामिक सम्बन्धलाई थप मजबुत बनाउन सहयोग पुग्ने विश्वास व्यक्त गरेको छ ।
प्रतिक्रिया