काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने र अमेरिकी राष्ट्रपति डोनाल्ड ट्रम्पका दक्षिण तथा मध्य एसियाका लागि विशेष दूत सर्जियो गोरबीच नयाँदिल्लीमा भेटवार्ता भएको छ ।
भारत भ्रमणमा रहेका लामिछानेसँग भएको भेटलाई फलदायी भएको उल्लेख गर्दै गोरले नेपाल-अमेरिका साझेदारीलाई थप सुदृढ बनाउने विषयमा सकारात्मक छलफल भएको बताएका छन् । सामाजिक सञ्जाल एक्समार्फत प्रतिक्रिया जनाउँदै उनले अमेरिका नेपालसँगको मित्रतालाई उच्च महत्व दिने र दुवै देशका लागि समृद्धि तथा अवसर विस्तार गर्ने साझा प्राथमिकतामा सहकार्य गर्न प्रतिबद्ध रहेको उल्लेख गरेका छन् ।
लामिछानेको पाँचदिने भारत भ्रमणका क्रममा भएको उक्त भेटलाई कूटनीतिक दृष्टिले महत्वपूर्ण मानिएको छ । भ्रमणका दौरान उनले भारतीय प्रधानमन्त्री नरेन्द्र मोदीसहित भारतका विभिन्न उच्च राजनीतिक नेतृत्वसँग पनि भेटवार्ता गरिसकेका छन् ।
भूराजनीति तथा कूटनीतिक विषयमा कलम चलाउँदै आएका स्पुतनिक इन्डियाका वरिष्ठ संवाददाता धैर्य महेश्वरीले समेत सामाजिक सञ्जालमार्फत लामिछाने र गोरबीचको भेटबारे जानकारी सार्वजनिक गरेका छन् ।
रास्वपाले भने भेटवार्ताका विषयवस्तुबारे विस्तृत जानकारी सार्वजनिक गरिसकेको छैन । तर नेपाल-अमेरिका सम्बन्ध, क्षेत्रीय सहकार्य तथा साझा चासोका विषयमा छलफल भएको अनुमान गरिएको छ ।
प्रतिक्रिया