काठमाडौं । सिङ्गापुरमा जारी एसियन गेम्स पुरुष क्रिकेट छनोट प्रतियोगिताको फाइनलमा नेपालले आज हङकङसँग प्रतिस्पर्धा गर्दैछ । सिङ्गापुर नेसनल क्रिकेट ग्राउन्डमा हुने खेल नेपाली समयअनुसार दिउँसो १२ः१५ बजे सुरु हुनेछ ।
सेमिफाइनलमा ओमानलाई ८ विकेटले पराजित गर्दै नेपाल फाइनलमा पुगेको हो । ओमानले दिएको ९५ रनको सामान्य लक्ष्य नेपालले ९.२ ओभरमा मात्र दुई विकेट गुमाएर पूरा गरेको थियो । नेपालका लागि लोकेश बमले अविजित ४४ रनको उत्कृष्ट इनिङ्स खेलेका थिए भने कुशल भुर्तेलले २० र रोहित पौडेलले अविजित २१ रन जोडेका थिए ।
त्यसअघि नेपालले ओमानलाई १९.४ ओभरमा ९४ रनमा समेटेको थियो । नेपालका लागि करण केसीले तीन विकेट लिए भने सोमपाल कामी र सन्दीप लामिछानेले समान दुई-दुई विकेट हात पारेका थिए ।
यता दोस्रो सेमिफाइनलमा हङकङले मलेसियालाई ६ विकेटले पराजित गर्दै उपाधि नजिक पुगेको हो । मलेसियाले दिएको ११५ रनको लक्ष्य हङकङले १८.२ ओभरमा चार विकेट गुमाएर पूरा गरेको थियो ।
जारी प्रतियोगितामा नेपाल र हङकङ दुवै टोली अपराजित रहँदै फाइनलमा पुगेका छन् । दुवै टोली उपाधिसँगै अपराजित यात्रालाई कायम राख्ने लक्ष्यमा हुनेछन् ।
हेड-टु-हेडमा नेपाल अगाडि
टी-२० अन्तर्राष्ट्रिय क्रिकेटमा नेपाल र हङकङबीच हालसम्म १४ पटक भेट भएको छ । जसमा नेपालले सात खेल जितेको छ भने हङकङ पाँच खेलमा विजयी भएको छ। दुई खेल वर्षाका कारण नतिजाविहीन भएका थिए ।
नेपालले समूह चरणमा चीनलाई २२१ रन र मलेसियालाई १६७ रनको फराकिलो अन्तरले हराउँदै सेमिफाइनल यात्रा तय गरेको थियो । उत्कृष्ट लयमा रहेको नेपाली टोली उपाधि जित्ने लक्ष्यसहित मैदान उत्रिनेछ ।
यसैबीच, प्रतियोगिताको तेस्रो स्थानका लागि आज मलेसिया र ओमानबीच पनि प्रतिस्पर्धा हुनेछ ।
प्रतिक्रिया