अमद डियालोको अन्तिम मिनेटको गोलमा आइभोरी कोस्टको विजयी सुरुआत

काठमाडौं । वैकल्पिक खेलाडीका रूपमा मैदान प्रवेश गरेका अमद डियालोले खेलको अन्तिम मिनेटमा निर्णायक गोल गरेपछि आइभोरी कोस्टले फिफा विश्वकप फुटबल २०२६ मा इक्वेडरमाथि रोमाञ्चक जित दर्ता गरेको छ ।

समूह ‘ई’ अन्तर्गत भएको प्रतिस्पर्धात्मक खेलमा आइभोरी कोस्टले बलियो प्रतिद्वन्द्वी इक्वेडरलाई पराजित गर्दै विश्वकप अभियानको सुखद सुरुआत गरेको हो ।

यो हारसँगै इक्वेडरको लगातार १९ खेलसम्म कायम रहेको अपराजित यात्रा पनि समाप्त भएको छ । यता, १२ वर्षपछि विश्वकपमा पुनरागमन गरेको अफ्रिकी राष्ट्र आइभोरी कोस्टका लागि यो जित ऐतिहासिक बनेको छ ।

खेलको ९० औँ मिनेटमा अमद डियालोले निर्णायक गोल गर्दै टोलीलाई महत्वपूर्ण तीन अंक दिलाए । म्यानचेस्टर युनाइटेडका विंगर डियालोले वैकल्पिक खेलाडीका रूपमा मैदान छिरेर टोलीको जित सुनिश्चित गरेका हुन् ।

यससँगै सन् २००६ यता विश्वकप इतिहासमा वैकल्पिक खेलाडीका रूपमा मैदान प्रवेश गरी खेलको अन्तिम समयमा विजयी गोल गर्ने पहिलो खेलाडीको कीर्तिमान पनि अमदले बनाएका छन् ।

खेलको अन्तिम समयमा इक्वेडरले बराबरी गोलको प्रयास गरे पनि आइभोरी कोस्टको रक्षापंक्तिले खतरा टार्न सफल भयो । अन्तिम आक्रमण विफल भएपछि रेफ्रीले खेल समाप्तिको सिट्टी बजाएका थिए ।

यस जितसँगै आइभोरी कोस्टले समूह ‘ई’ मा महत्वपूर्ण तीन अंक जोडेको छ भने इक्वेडरले अप्रत्याशित हारसँगै प्रतियोगिताको सुरुआत गरेको छ ।