काठमाडौं । फिफा विश्वकपअन्तर्गत समूह ‘बी’ को दोस्रो खेलमा क्यानडाले कतारलाई ६-० को फराकिलो अन्तरले पराजित गर्दै ऐतिहासिक जित दर्ता गरेको छ । विश्वकप इतिहासमा समूह चरणको खेलमा क्यानडाले हासिल गरेको यो पहिलो जित हो ।
सन् १९८६ र २००२ को विश्वकपमा सहभागी भएको क्यानडाले त्यसअघि समूह चरणमा कुनै पनि खेल जित्न सकेको थिएन । घरेलु समर्थकमाझ प्राप्त ६-० को जित क्यानडाको विश्वकप इतिहासकै सबैभन्दा ठूलो जितसमेत बनेको छ ।
खेलको १६औँ मिनेटमा क्लाइल केरिनले गोल गर्दै क्यानडालाई अग्रता दिलाएका थिए। त्यसपछि जोनाथन डेभिडले ३९ औँ मिनेटमा गोल गरे भने पहिलो हाफको इन्जुरी समयमा अर्को गोल थप्दै टोलीलाई ३-० को आरामदायी अग्रता दिलाए ।
कतारका लागि खेल झन् कठिन बन्दै गयो । ३३ औँ मिनेटमा होमाम अहमदले रातो कार्ड पाएपछि कतार १० खेलाडीमा सीमित भयो। दोस्रो हाफको ५५ औँ मिनेटमा असिम ओमामिदोलाई पनि रातो कार्ड देखाइएपछि कतार नौ खेलाडीमा झर्यो ।
खेलको ६३ औँ मिनेटमा लियाम मिलरले चौथो गोल थपे । ७४ औँ मिनेटमा मोहम्मद मुनाइले आत्मघाती गोल गरेपछि क्यानडाको अग्रता ५-० पुगेको थियो ।
इन्जुरी समयमा जोनाथन डेभिडले व्यक्तिगत तेस्रो गोल गर्दै ह्याट्रिक पूरा गरे र क्यानडालाई ६-० को शानदार जित दिलाए ।
यस जितसँगै क्यानडाले दुई खेलबाट चार अंक जोडेको छ । पहिलो खेलमा बोस्निया-हर्जगोभिनासँग बराबरी खेलेको क्यानडा समूह ‘बी’ मा नकआउट चरण प्रवेशको बलियो दाबेदार बनेको छ । यता, लगातार खराब प्रदर्शन गरेको कतार दबाबमा परेको छ ।
प्रतिक्रिया