काठमाडौं । फिफा विश्वकप फुटबल २०२६ अन्तर्गत समूह ‘सी’ मा मोरक्कोले पहिलो जित दर्ता गरेको छ । शनिबार बिहान बोस्टन स्टेडियममा सम्पन्न खेलमा स्कटल्याण्डलाई १-० गोलले पराजित गर्दै मोरक्कोले महत्वपूर्ण तीन अंक हासिल गरेको हो ।
मोरक्कोको जितमा इस्माइल साईबारी नायक बने। उनले खेलको दोस्रो मिनेटमै गरेको गोल नै निर्णायक साबित भयो । सुरुआती अग्रता लिएपछि मोरक्कोले खेलभर रक्षात्मक अनुशासन कायम राख्दै स्कटल्याण्डलाई बराबरी गर्ने अवसर दिएन ।
यस जितसँगै मोरक्कोले दुई खेलबाट चार अंक जोड्दै समूह ‘सी’ को शीर्षस्थानमा उक्लिएको छ । पहिलो खेलमा मोरक्कोले ब्राजिलसँग १-१ को बराबरी खेलेको थियो ।
यता, पहिलो खेलमा हाइटीलाई पराजित गरेको स्कटल्याण्ड भने दोस्रो खेलमा हार बेहोर्दै तीन अंकमै सीमित भएको छ । यसले समूहको प्रतिस्पर्धालाई थप रोचक बनाएको छ ।
समूह ‘सी’ अन्तर्गत अब ब्राजिल र हाइटीबीचको खेल शनिबार बिहान हुने तालिका छ । उक्त खेलको नतिजाले समूहको शीर्ष स्थान र नकआउट चरणको समीकरणमा महत्वपूर्ण प्रभाव पार्ने अपेक्षा गरिएको छ ।
मोरक्कोले भने यो जितसँगै नकआउट चरण प्रवेशको सम्भावना बलियो बनाएको छ ।
प्रतिक्रिया