विष्णु पौडेललाई काठमाडौं ल्याइयो, सम्पत्ति शुद्धीकरण विभागमा अनुसन्धान सुरु

काठमाडौं । नेकपा एमालेका उपाध्यक्ष तथा पूर्वउपप्रधानमन्त्री विष्णुप्रसाद पौडेललाई सम्पत्ति शुद्धीकरण अनुसन्धान विभागको कार्यालयमा उपस्थित गराइएको छ । सोमबार सुर्खेतको वीरेन्द्रनगरस्थित शुभ होटल परिसरबाट पक्राउ परेका पौडेललाई मंगलबार बिहान नेपालगञ्ज हुँदै हवाईमार्गबाट काठमाडौं ल्याएर विभागमा हाजिर गराइएको हो ।

सम्पत्ति शुद्धीकरणसम्बन्धी मुद्दामा अनुसन्धानका लागि विभागले सोमबार नै जिल्ला प्रहरी कार्यालय सुर्खेतलाई इमेलमार्फत पक्राउ गर्न निर्देशन दिएको थियो । सोही आधारमा प्रहरीले एमालेको चुनावी समीक्षा तथा पार्टी पुनर्गठन कार्यक्रम चलिरहेका बेला पौडेललाई नियन्त्रणमा लिएको थियो ।

पक्राउपछि उनलाई राति नेपालगञ्जस्थित प्रहरी गणमा राखिएको थियो । त्यसपछि मंगलबार बिहान काठमाडौं ल्याएर विभागसमक्ष उपस्थित गराइएको हो ।

पौडेलमाथि अब सम्पत्ति शुद्धीकरणसम्बन्धी अभियोगमा विस्तृत अनुसन्धान अघि बढाइने भएको छ । सरकारी स्रोतका अनुसार उनीमाथि हाल कारागारमा रहेका व्यवसायी दीपक भट्टसँग आर्थिक कारोबार तथा निकट सम्बन्ध रहेको आशंकामा अनुसन्धान केन्द्रित गरिएको छ ।

घटनाले राष्ट्रिय राजनीतिक वृत्तमा व्यापक चर्चा पाएको छ भने एमालेले यसबारे औपचारिक प्रतिक्रिया सार्वजनिक गर्न बाँकी रहेको छ ।