काठमाडौं । फिफा विश्वकप २०२६ अन्तर्गत समूह ‘के’ को अन्तिम खेलमा कोलम्बिया र पोर्चुगलले गोलरहित बराबरी खेल्दै नकआउट चरण (अन्तिम ३२) मा स्थान सुरक्षित गरेका छन् ।
मियामीस्थित हार्ड रक स्टेडियममा सम्पन्न प्रतिस्पर्धात्मक खेलमा दुवै टोलीले उत्कृष्ट अवसर सिर्जना गरे पनि कुनै पनि टोलीले गोल गर्न सकेन । अधिकांश समय खेलमा कोलम्बियाले दबाब बनाए पनि पोर्चुगलको रक्षापङ्क्ति र गोलकिपरले उत्कृष्ट प्रदर्शन गरे । यता, पोर्चुगलका स्टार स्ट्राइकर क्रिस्टियानो रोनाल्डो पनि गोल गर्न असफल रहे ।
खेलको अन्तिम समयमा कोलम्बियाले गोल गर्ने सुनौलो अवसर गुमाएको थियो भने दुवै टोलीका गोलकिपरले महत्त्वपूर्ण बचाउ गर्दै खेललाई गोलरहित बराबरीमा टुंग्याए ।
यो बराबरीसँगै तीन खेलबाट ७ अंक जोडेको कोलम्बिया समूह ‘के’ को विजेता बन्दै नकआउट चरणमा पुगेको छ । ५ अंक जोडेको पोर्चुगल समूह उपविजेताका रूपमा अघिल्लो चरणमा प्रवेश गरेको छ ।
अब नकआउट चरणमा समूह विजेता कोलम्बियाले घानाको सामना गर्नेछ भने पोर्चुगलले क्रोएसियासँग प्रतिस्पर्धा गर्नेछ ।
प्रतिक्रिया