काठमाडौं । अतिरिक्त समयको इन्जुरी समयमा ग्याब्रिएल मार्टिनेलीले निर्णायक गोल गरेपछि पाँच पटकको विश्वविजेता ब्राजिल फिफा विश्वकप २०२६ को अन्तिम १६ मा प्रवेश गरेको छ ।
अमेरिकामा सोमबार राति सम्पन्न राउन्ड अफ ३२ को रोमाञ्चक खेलमा ब्राजिलले जापानलाई २-१ गोलअन्तरले पराजित गर्दै नकआउट चरणको अर्को यात्रा तय गरेको हो ।
दोस्रो हाफमा वैकल्पिक खेलाडीका रूपमा मैदान प्रवेश गरेका मार्टिनेलीले इन्जुरी समयको छैटौँ मिनेटमा गोल गर्दै ब्राजिललाई अविस्मरणीय जित दिलाए । अब ब्राजिलले अन्तिम १६ मा आइभोरी कोस्ट वा नर्वेमध्ये एक टोलीसँग प्रतिस्पर्धा गर्नेछ ।
खेलको २९औँ मिनेटमा काइसु सानोले शानदार गोल गर्दै जापानलाई सुरुआती अग्रता दिलाएका थिए । उनले मिडफिल्डमा ब्राजिलका खेलाडीबाट बल खोसेर डिबक्स बाहिरबाट गरेको शक्तिशाली प्रहार गोलमा परिणत गरेका थिए ।
एक गोलले पछि परेको ब्राजिलले दोस्रो हाफमा लगातार दबाब सिर्जना गर्यो । ५२ औँ मिनेटमा ब्रुनो गुइमारेसको हेडरलाई जापानी गोलकिपर जायन सुजुकीले उत्कृष्ट बचाउ गरे । त्यसको चार मिनेटपछि ५६ औँ मिनेटमा ग्याब्रिएल मागाल्हेसको पासमा क्यासेमिरोले हेडरमार्फत गोल गर्दै खेललाई १–१ को बराबरीमा ल्याए ।
५८ औँ मिनेटमा जारी विश्वकपमा चार गोल गरिसकेका भिनिसियस जुनियरले ब्राजिललाई अग्रता दिलाउने सुनौलो अवसर पाए पनि उनको प्रहारलाई गोलकिपर सुजुकीले विफल पार्दै जापानलाई खेलमा जोगाएका थिए ।
निर्धारित ९० मिनेट १-१ को बराबरीमा सकिएपछि खेल अतिरिक्त समयमा पुगेको थियो । दुवै टोलीले जितका लागि प्रयास जारी राखेका बेला इन्जुरी समयको अन्तिम क्षणमा मार्टिनेलीले निर्णायक गोल गर्दै ब्राजिललाई अन्तिम १६ मा पुर्याए ।
यो हारसँगै जापानको विश्वकप नकआउट चरणमा पहिलो जित निकाल्ने सपना फेरि अधुरै बनेको छ। साथै, जापानको पछिल्लो १० खेलको अपराजित यात्रा पनि यही खेलसँगै समाप्त भएको छ ।
ब्राजिलका लागि यो जित ऐतिहासिक संयोग पनि बन्यो । सन् १९५८ मा यही मितिमा १७ वर्षीय पेलेले दुई गोल गर्दै ब्राजिललाई स्विडेनविरुद्ध पहिलो विश्वकप उपाधि दिलाएका थिए । सोही ऐतिहासिक उपलब्धिको वार्षिकोत्सवकै दिन ब्राजिलले अर्को स्मरणीय जित दर्ता गरेको हो ।
ब्राजिल र जापानबीच फुटबल तथा सांस्कृतिक सम्बन्ध पनि निकै गहिरो मानिन्छ । जापान बाहिर सबैभन्दा धेरै जापानी मूलका नागरिक ब्राजिलमा बसोबास गर्छन् । ब्राजिलियन फुटबल लिजेन्ड जिकोले जापानी फुटबलको विकासमा महत्वपूर्ण योगदान दिएका थिए। उनले सन् १९९१ मा जापानी क्लब कासिमा एन्ट्लर्सबाट खेल्दै जापानी फुटबललाई नयाँ उचाइमा पुर्याएका थिए ।
ब्राजिल र जापानबीच हालसम्म भएका १५ भेटमध्ये ब्राजिलको यो १२ औँ जित हो । समूह चरणमा ब्राजिलले मोरक्कोसँग बराबरी खेल्दै हाइटी र स्कटल्यान्डलाई पराजित गरेर नकआउट चरणमा स्थान बनाएको थियो भने जापान समूह ‘एफ’ को उपविजेता बन्दै अन्तिम ३२ मा पुगेको थियो ।
प्रतिक्रिया