काठमाडौं । सह-आयोजक क्यानडालाई ३-० गोलअन्तरले पराजित गर्दै मोरक्को फिफा विश्वकप २०२६ को क्वाटरफाइनलमा प्रवेश गरेको छ । यस जितसँगै मोरक्को विश्वकप इतिहासमा एकभन्दा बढी पटक क्वाटरफाइनल पुग्ने पहिलो अफ्रिकी राष्ट्र बनेको छ ।
अब सेमिफाइनल प्रवेशका लागि मोरक्कोले उपाधि दाबेदार फ्रान्ससँग प्रतिस्पर्धा गर्नेछ ।
पहिलो हाफमा घरेलु समर्थकको साथ पाएको क्यानडाले आक्रामक खेल प्रदर्शन गर्दै मोरक्कोमाथि लगातार दबाब सिर्जना गरेको थियो । तर मोरक्कोका अनुभवी गोलरक्षक यासिन बोनो उत्कृष्ट लयमा देखिए । उनले विशेषगरी फरवार्ड तानी ओलुवासेयीको शक्तिशाली प्रहारलाई रोकेर टोलीलाई सुरुआती संकटबाट जोगाए ।
गोलरहित बराबरीमा सकिएको पहिलो हाफपछि मोरक्कोले दोस्रो हाफमा खेलको स्वरूप नै बदल्यो । खेलको ५० औँ मिनेटमा अचरफ हाकिमीको फ्रिकिक पासमा अजेदिन उनाहीले डिबक्स बाहिरबाट शानदार प्रहार गर्दै टोलीलाई अग्रता दिलाए ।
एक गोलले पछि परेको क्यानडाले बराबरीका लागि निरन्तर प्रयास गरे पनि त्यसको फाइदा मोरक्कोले काउन्टर अट्याकमा उठायो । ८२ औँ मिनेटमा ब्राहिम डियाजको पासमा उनाहीले व्यक्तिगत दोस्रो गोल गर्दै मोरक्कोको अग्रता दोब्बर बनाए ।
इन्जुरी समयको ९८ औँ मिनेटमा सुफियान राहिमीले अर्को गोल थपेपछि मोरक्कोले ३-० को प्रभावशाली जित दर्ता गर्यो ।
यो जितसँगै विश्वकपको नकआउट चरणमा अफ्रिकी टोलीहरूले हासिल गरेका आठ जितमध्ये चार जित मोरक्कोको नाममा पुगेका छन् । क्यामरुन, सेनेगल, घाना र इजिप्टले समान एक-एक जित हासिल गरेका छन् ।
यता, यस हारसँगै फिफा विश्वकप २०२६ का तीन सह-आयोजकमध्ये क्यानडा प्रतियोगिताबाट बाहिरिने पहिलो टोली बनेको छ ।
अब क्वाटरफाइनलमा मोरक्कोको सामना फ्रान्ससँग हुनेछ । फ्रान्सले अन्तिम १६ मा पाराग्वेलाई १-० ले पराजित गर्दै अन्तिम आठमा स्थान बनाएको थियो । अफ्रिकी फुटबलको नयाँ इतिहास रचिरहेको मोरक्को र उपाधिका प्रमुख दाबेदार फ्रान्सबीचको भिडन्त विश्वकपकै सबैभन्दा प्रतीक्षित खेलमध्ये एक हुने अपेक्षा गरिएको छ ।
प्रतिक्रिया