सार्वजनिक स्थलमा महिलासामु अश्लील हर्कत गरेको आरोपमा शिक्षा अधिकृत पक्राउ

काठमाडौं । सार्वजनिक स्थलमा एक महिलासामु अश्लील हर्कत गरेको आरोपमा रक्षा मन्त्रालयमा कार्यरत एक शिक्षा अधिकृतलाई प्रहरीले पक्राउ गरेको छ।

पक्राउ पर्नेमा बैतडीको पाटन नगरपालिका–७ स्थायी घर भई हाल ललितपुर महानगरपालिका–२ इमाडोल बस्ने ५५ वर्षीय सुरेन्द्र भट्ट रहेका छन्। प्रारम्भिक अनुसन्धानअनुसार उनी सिंहदरबारस्थित रक्षा मन्त्रालयमा शिक्षा अधिकृतका रूपमा कार्यरत छन्।

प्रहरीका अनुसार केही दिनअघि ललितपुरको महालक्ष्मी नगरपालिका–२ इमाडोलस्थित सार्वजनिक सडकमा हिँडिरहेकी एक महिलासामु उनले आफ्नो गोप्य अंग प्रदर्शन गरेको आरोप लागेको हो।

घटनापछि पीडित महिलाले उक्त घटनाको भिडियो सामाजिक सञ्जालमार्फत सार्वजनिक गरेकी थिइन्। भिडियो सार्वजनिक भएपछि प्रहरी वृत्त सातदोबाटोको टोलीले अनुसन्धान अघि बढाएर भट्टलाई पक्राउ गरेको हो।

हाल उनलाई प्रहरी वृत्त सातदोबाटोको हिरासतमा राखी सार्वजनिक शिष्टाचारविरुद्धको कसुर तथा घटनासँग सम्बन्धित अन्य पक्षबारे थप अनुसन्धान भइरहेको प्रहरीले जनाएको छ।