दुई गोलले पछि परेको अर्जेन्टिनाको अविश्वसनीय पुनरागमन, इजिप्टलाई हराउँदै क्वाटरफाइनलमा प्रवेश

काठमाडौं । डिफेन्डिङ च्याम्पियन अर्जेन्टिनाले दुई गोलले पछि परेको अवस्थाबाट शानदार पुनरागमन गर्दै इजिप्टलाई ३-२ ले पराजित गरेको छ । रोमाञ्चक जितसँगै अर्जेन्टिनाले फिफा विश्वकप २०२६ को क्वाटरफाइनलमा स्थान सुरक्षित गरेको हो ।

खेलको सुरुआतमै इजिप्टले अर्जेन्टिनामाथि दबाब बनाउँदै १५ औँ मिनेटमा यासिर इब्राहिमको गोलमार्फत अग्रता लिएको थियो ।

१९ औँ मिनेटमा अर्जेन्टिनाले पेनाल्टीको अवसर पाए पनि कप्तान लियोनल मेस्सी गोल गर्न असफल हुँदा पहिलो हाफ इजिप्ट १-० को अग्रतासहित सकियो ।

दोस्रो हाफको ५७ औँ मिनेटमा मोस्ताफा जिकोले इजिप्टका लागि दोस्रो गोल गरे पनि भिडियो सहायक रेफ्री (भीएआर) ले त्यसअघि फाउल भएको देखाएपछि गोलले मान्यता पाएन। तर जिकोले ६६ औँ मिनेटमा फेरि गोल गर्दै इजिप्टलाई २-० को बलियो अग्रता दिलाए ।

खेलको ७७ औँ मिनेटसम्म दुई गोलले पछि परेको अर्जेन्टिनाले त्यसपछि अविश्वसनीय पुनरागमन गर्‍यो । ७८ औँ मिनेटमा क्रिस्टियन रोमेरोले गोल गर्दै अन्तर घटाए ।
त्यसपछि ८३ औँ मिनेटमा कप्तान लियोनल मेस्सीले बराबरी गोल गर्दै अर्जेन्टिनालाई खेलमा फर्काए। इन्जुरी समयको दोस्रो मिनेट (९२ औँ मिनेट) मा इन्जो फर्नान्डेजले निर्णायक गोल गरेपछि अर्जेन्टिनाले ३-२ को रोमाञ्चक जित हात पार्यो ।

दुई गोलले पछि परेको अवस्थाबाट निकालेको यो जित अर्जेन्टिनाका लागि जारी विश्वकपकै सबैभन्दा स्मरणीय पुनरागमनमध्ये एक बनेको छ ।

अब अर्जेन्टिनाले सेमिफाइनल प्रवेशका लागि क्वाटरफाइनलमा स्विट्जरल्यान्ड र कोलम्बियाबीच हुने खेलको विजेतासँग प्रतिस्पर्धा गर्नेछ ।