काठमाडौं । जुड बेलिंघमको उत्कृष्ट प्रदर्शनमा इंग्ल्यान्ड नर्वेलाई २-१ ले पराजित गर्दै विश्वकप फुटबलको सेमिफाइनलमा प्रवेश गरेको छ ।
रोमाञ्चक क्वार्टरफाइनल खेलमा इंग्ल्यान्डलाई जित दिलाउन बेलिंघमले दुवै गोल गरे । खेलको ३६ औँ मिनेटमा एन्ड्रियस इस्लेअपले गोल गर्दै नर्वेलाई अग्रता दिलाएका थिए । तर पहिलो हाफ सकिनुअघि बेलिंघमले गोल फर्काउँदै इंग्ल्यान्डलाई १-१ को बराबरीमा पुर्याए ।
दोस्रो हाफको ५४ औँ मिनेटमा टोबजन हेगमले गोल गरे पनि भीएआर परीक्षणपछि उक्त गोलले मान्यता पाएन । गोल हुनुअघि एर्लिङ हालाण्डले इंग्ल्यान्डका एक डिफेन्डरमाथि फाउल गरेको निष्कर्ष निकाल्दै रेफ्रीले गोल रद्द गरेका थिए ।
निर्धारित ९० मिनेट र इन्जुरी समयमा दुवै टोलीबाट थप गोल हुन नसकेपछि खेल अतिरिक्त समयमा पुगेको थियो । अतिरिक्त समयको ९३औँ मिनेटमा बेलिंघमले व्यक्तिगत दोस्रो तथा टोलीका लागि निर्णायक गोल गर्दै इंग्ल्यान्डलाई अन्तिम चारमा पुर्याए ।
जितसँगै इंग्ल्यान्डले सेमिफाइनलमा स्थान सुरक्षित गरेको छ । अब इंग्ल्यान्डले अर्जेन्टिना र स्विट्जरल्याण्डबीचको क्वार्टरफाइनल खेलको विजेतासँग फाइनल प्रवेशका लागि प्रतिस्पर्धा गर्नेछ ।
प्रतिक्रिया