बुटवल । बुटवलको राजमार्ग चौराहामा भएको सवारी दुर्घटनामा एक स्कुटी चालकको मृत्यु भएको छ ।
मृत्यु हुनेमा रुपन्देहीको सिद्धार्थनगर नगरपालिका-५, बैंक रोड निवासी ६० वर्षीय तारचन सुनार रहेको प्रहरीले जनाएको छ ।
प्रहरीका अनुसार भैरहवाबाट बुटवलतर्फ आउँदै गरेको लु २ ख ३००२ नम्बरको टिप्परले सोही दिशातर्फ गुडिरहेको स्कुटरलाई पछाडिबाट ठक्कर दिएको थियो । तीव्र गतिमा रहेको टिप्परको ठक्करबाट स्कुटर चालक गम्भीर घाइते भएका थिए ।
दुर्घटनापछि चौराहामा खटिएका ट्राफिक प्रहरी र स्थानीयवासीले घाइते सुनारको तत्काल उद्धार गरी उपचारका लागि अस्पताल पुर्याएका थिए । तर उपचारका क्रममा उनको मृत्यु भएको प्रहरीले जनाएको छ ।
दुर्घटनामा स्कुटर पूर्ण रूपमा क्षतिग्रस्त भएको छ । इलाका प्रहरी कार्यालय बुटवलका प्रहरी निरीक्षक थमन जिसीका अनुसार मृतकको साथबाट २ लाख ५० हजार रुपैयाँ नगद समेत फेला परेको छ ।
ठक्कर दिने टिप्पर र चालकलाई घटनास्थलबाटै नियन्त्रणमा लिइएको प्रहरीले जनाएको छ । चालकलाई थप अनुसन्धान तथा कानुनी कारबाहीका लागि इलाका प्रहरी कार्यालय बुटवलमा राखिएको छ ।
घटनाबारे थप अनुसन्धान भइरहेको प्रहरीले जनाएको छ ।
प्रतिक्रिया