बाढी बस्तीमा पस्दा बाजुरामा १३ परिवार विस्थापित

काठमाडौं । अविरल वर्षापछि आएको बाढी बस्तीमा पस्दा बाजुराको बडिमालिका नगरपालिका-९ का १३ परिवार विस्थापित भएका छन् । lबिहीबार राति सेलागाड खोला र बाउली खोलाको दोभान नजिकबाट बाढी बस्तीमा पसेपछि स्थानीयवासी जोखिममा परेका हुन् ।

बाढीले बस्ती नै जोखिममा पारेपछि नेपाल प्रहरीसहितको उद्धार टोलीले प्रभावित परिवारलाई रातारात सुरक्षित स्थानमा सारेको जनाएको छ । प्रहरीका अनुसार विस्थापित परिवारलाई तत्कालका लागि नजिकैका स्थानीयवासीका सुरक्षित घरमा आश्रय दिइएको छ । स्थानान्तरण गरिएका १३ घरमध्ये तीन वटा घर उच्च जोखिममा रहेको जनाइएको छ ।

जिल्ला विपद् व्यवस्थापन समितिले सार्वजनिक गरेको ‘विपद् पूर्वतयारी तथा प्रतिकार्य योजना-२०८३’ अनुसार बाजुराका एक सयभन्दा बढी बस्ती बाढी र पहिरोको उच्च जोखिममा रहेका छन् ।

यता, निरन्तर वर्षासँगै गएको पहिरोका कारण बडिमालिका नगरपालिका-६ र जिल्ला कारागार पछाडिको क्षेत्रमा सडक अवरुद्ध भएको प्रहरीले जनाएको छ । सम्बन्धित निकायले सडक खुलाउने प्रयास गरिरहेको छ भने वर्षा जारी रहेकाले जोखिमयुक्त क्षेत्रमा सतर्कता अपनाउन स्थानीयलाई आग्रह गरिएको छ ।