साउनको दोस्रो सोमबार : पशुपतिनाथमा बिहानैदेखि भक्तजनको घुइँचो

काठमाडौं । साउन महिनाको दोस्रो सोमबार आज भगवान् शिवको आराधना र दर्शनका लागि देशभरका शिवालयमा भक्तजनको उल्लेख्य भीड लागेको छ । विशेषगरी पशुपतिनाथ मन्दिरमा बिहानैदेखि श्रद्धालुको घुइँचो लागेको छ ।

पशुपति क्षेत्र विकास कोषका अनुसार यस वर्ष दर्शनार्थीको चापलाई मध्यनजर गर्दै सबै भक्तजनले सहज रूपमा दर्शन गर्न सक्ने गरी विशेष व्यवस्था मिलाइएको छ । मन्दिर प्रवेशका लागि चार वटा लामको व्यवस्था गरिएको छ भने बिहानदेखि भक्तजनको उपस्थिति बाक्लिए पनि लाम अत्यधिक लामो नभएको कोषले जनाएको छ ।

कोषका सदस्य सचिव तीर्थ श्रेष्ठले साउनका सोमबार दर्शनका लागि आउने लाखौँ भक्तजनलाई सुरक्षित, व्यवस्थित र मर्यादित वातावरणमा पूजा तथा दर्शन गराउने गरी आवश्यक सबै तयारी पूरा गरिएको जानकारी दिए ।

पशुपति क्षेत्र विकास कोषका सञ्चालक परिषद् सदस्य केदारमान भण्डारीका अनुसार आज मन्दिरमा आउने सबै श्रद्धालुलाई दर्शनको व्यवस्था मिलाइएको छ । दर्शनार्थीको सुविधाका लागि प्राथमिक उपचार, स्वास्थ्य सेवा तथा अन्य आवश्यक व्यवस्थासमेत गरिएको छ ।

पशुपति क्षेत्रमा नेपाली सेना, नेपाल प्रहरी, सशस्त्र प्रहरी बललगायत विभिन्न संस्थाले निःशुल्क स्वास्थ्य शिविर सञ्चालन गरेका छन् भने सुरक्षा व्यवस्थासमेत कडा पारिएको छ ।

पशुपतिनाथसँगै काठमाडौं उपत्यकाका गोकर्णेश्वर, डोलेश्वर, नागेश्वर, मक्खन महादेवलगायतका शिव मन्दिर तथा देशभरका शिवालयमा पनि बिहानैदेखि भक्तजनको भीड लागेको छ ।

धार्मिक मान्यताअनुसार पशुपतिनाथ मन्दिरमा श्रीयन्त्र र गोकर्णेश्वर मन्दिरमा बालयन्त्रको पूजा हुने भएकाले यी दुवै मन्दिरमा दर्शन गर्नुलाई विशेष धार्मिक महत्वका रूपमा लिने गरिन्छ ।