काठमाडौं । चान्द्रमासअनुसार साउन महिनाको तेस्रो सोमबारका अवसरमा आज बिहानैदेखि पशुपतिनाथ मन्दिर सहित देशभरका शिवालयमा दर्शनार्थीको उल्लेखनीय घुइँचो लागेको छ ।
दर्शनार्थीको सहज आवागमन र पूजाआजाका लागि पशुपतिनाथ मन्दिरका चारैवटा ढोका खोलिएको पशुपति क्षेत्र विकास कोषले जनाएको छ । साथै, बोलबम यात्रुका लागि विशेष व्यवस्था गरिएको छ भने मन्दिर प्रवेशका लागि चारवटा लामको व्यवस्था मिलाइएको छ ।
पशुपतिनाथसँगै गोकर्णेश्वर मन्दिर, नागेश्वर मन्दिर, डोलेश्वर महादेव मन्दिर तथा मक्खन महादेव मन्दिर लगायत राजधानीका प्रमुख शिवालयमा पनि बिहानैदेखि भक्तजनको लाम लागेको जनाइएको छ ।
साउन महिनाका सोमबार भगवान् शिवको विशेष पूजा-आराधना गर्ने धार्मिक परम्परा रहेकाले हरेक वर्ष यस अवधिमा देशभरका शिव मन्दिरमा श्रद्धालुको उल्लेखनीय भीड लाग्ने गर्दछ ।
प्रतिक्रिया