पहिरोले नारायणगढ-मुग्लिन सडक अवरुद्ध, खुलाउने प्रयास जारी

चितवन । नारायणगढ-मुग्लिन सडकखण्डको मुग्लिन नजिकै पहिरो खस्दा यातायात आवागमन अवरुद्ध भएको छ ।

इच्छाकामना गाउँपालिका-७ स्थित सार्वजनिक शौचालय खहरे खोला नजिक आज बिहान पहिरोबाट सडक अवरुद्ध भएको हो । पहिरो पन्छाउने कार्य सुरु भैसकेको सडक डिभिजन कार्यालय भरतपुरले जनाएको छ ।

जिल्ला ट्राफिक प्रहरी कार्यालयका प्रमुख प्रहरी निरीक्षक अनिल थापाका अनुसार तत्काल पहिरो पन्छाउने काम थालिएको र यो कार्य कम्तीमा दुई घण्टा लाग्ने छ ।

पहिरो पन्छाउनको लागि सम्बन्धित स्थानमा २ वटा मेशिनद्वारा पहिरो हटाउने कार्य भैरहेको छ र थप १ वटा मेशिन आउँदै गरेको सडक डिभिजन भरतपुरले जनाएको छ । थप पहिरो नझरे अबको करिब १/२ घण्टाभित्र पहिरो हटाई सवारि आवागमन सुचारू हुने जानकारी पनि डिभिजनले गराएको छ ।