काठमाडौं । त्रिभुवन विश्वविद्यालय (त्रिवि) अन्तर्गतको एमबीएस प्रथम सेमेस्टरको प्रश्नपत्र बाहिरिएको प्रकरणमा प्रहरीले थप दुई जनालाई पक्राउ गरेको छ।
नेपाल प्रहरीको केन्द्रीय अनुसन्धान ब्युरो (सीआईबी)ले रौतहटको राजदेवी नगरपालिका–४ निवासी २५ वर्षीय अतुल कुमार मिश्र र बाराको लिपनीमाल घर भएका ३१ वर्षीय अब्दुल सानी हाकिमलाई पक्राउ गरेको हो।
यसअघि यही प्रकरणमा दुई जना पक्राउ परिसकेका थिए। पछिल्ला दुई जनाको पक्राउसँगै प्रश्नपत्र आउट प्रकरणमा पक्राउ पर्ने व्यक्तिको संख्या चार पुगेको छ।
सीआईबीका एसएसपी अनुपम शमशेर जबराका अनुसार पक्राउ परेकामाथि शिक्षा ऐन अन्तर्गतको कसुरमा अनुसन्धान अघि बढाइएको छ। उनीहरू प्रश्नपत्र बाहिरिएको घटनामा संलग्न रहेको आशंकामा थप अनुसन्धान भइरहेको प्रहरीले जनाएको छ।
एमबीएस प्रथम सेमेस्टरको प्रश्नपत्र परीक्षा अघि नै बाहिरिएको विषय सार्वजनिक भएपछि सीआईबीले घटनाको अनुसन्धान तीव्र बनाएको हो।
प्रतिक्रिया