दाङ । लुम्बिनी प्रदेशका मुख्यमन्त्री चेतनारायण आचार्यले अनुदानको रासायनिक मल वितरणमा समान र स्पष्ट नीति बनाउन सम्बन्धित निकायलाई निर्देशन दिएका छन् ।
उनले मुख्यमन्त्री तथा मन्त्रिपरिषद्को कार्यालय राप्ती उपत्यकामा आजको छलफलमा खाद्यन्न बालीसहित उखु, केरा र मकैखेती गर्ने किसानलाई समेत प्राथमिकतामा राखेर वितरण प्रक्रिया व्यवस्थापन गर्न निर्देशन दिएका हुन् ।
कृषि, भूमि व्यवस्था तथा सहकारी मन्त्रालयका सचिव डा नीतु पण्डितले देशभर वार्षिक करिब १४ लाख मेट्रिकटन रासायनिक मल आवश्यक रहेको बताइन् ।
उनले आवश्यकता अनुसारको मल आयात गर्न कठिन भइरहेको जानकारी दिइन् । छलफलमा उखु उत्पादक किसानले रासायनिक मल तथा कृषि औजारमा नीतिगत समस्या झेल्दै आएको गुनासो व्यक्त गरिन् । बर्दियास्थित राजापुर सुगर एण्ड केमिकल्स इन्डस्ट्रिज प्रालिले आगामी सिजनमा उखुखेती विस्तारका लागि रासायनिक मलको सुनिश्चितता गरिदिन प्रदेश सरकारसँग माग गरेको थियो ।
यहाँ करिब दुई हजार किसानले तीन हजार बिघा क्षेत्रफलमा उखुखेती गरेका छन् । आगामी सिजनमा पाँच हजार किसानलाई उखुखेतीमा आकर्षण गरिने योजना रहेको छ ।
छलफलमा नेकपा -एमाले) बर्दियाका अध्यक्ष सालिकराम अधिकारी, उखु उत्पादक किसान समितिका अध्यक्ष कृष्णकुमार रेग्मी, राजापुर सुगर एण्ड केमिकल्स इन्डस्ट्रिज प्रालिका प्रशासन प्रमुख इन्द्रप्रसाद ढकाल तथा किसान समिति सदस्य ओमप्रकाश यादवलगायतका व्यक्तिको सहभागिता थियो ।
प्रतिक्रिया