काठमाडौं । अमेरिकी अलराउन्डर हरमित सिंहले आगामी सिजनको नेपाल प्रिमियर लिग (एनपिएल) क्रिकेट जनकपुर बोल्ट्सबाट खेल्ने भएका छन् । जनकपुर बोल्ट्सले शनिबार सामाजिक सञ्जालमार्फत हरमितलाई अनुबन्ध गरेको घोषणा गरेको हो ।
जनकपुरले एसोसिएट क्रिकेटका प्रभावशाली खेलाडी हरमितलाई आगामी सिजनका लागि कप्तानको जिम्मेवारीसमेत दिएको छ । बायाँहाते स्पिन अलराउन्डर हरमितले एनपिएलका पहिलो दुई सिजन सुदूरपश्चिम रोयल्सलाई उपविजेता बनाउन महत्वपूर्ण भूमिका खेलेका थिए ।
हरमितलाई टोलीमा भित्र्याउन पाउँदा जनकपुर बोल्ट्स उत्साहित रहेको क्लबका प्रमुख कार्यकारी अधिकृत निरोज खतिवडाले बताएका छन् ।
एनपिएलको पहिलो सिजनमा आसिफ शेख मार्की खेलाडी रहे पनि अनिल साहको कप्तानीमा जनकपुर बोल्ट्सले उपाधि जितेको थियो । दोस्रो सिजनमा अपेक्षाकृत कमजोर प्रदर्शन गरेपछि बोल्ट्सले अनिललाई हटाएर दक्षिण अफ्रिकाका वायन पार्नेललाई कप्तान बनाएको थियो । पार्नेल घाइते भएपछि नामिबियाका जान निकोल लोफ्टी–इटनले टोलीको कप्तानी सम्हालेका थिए ।
दोस्रो सिजनमा जनकपुरले सातमध्ये एक खेलमा मात्र जित हात पार्दै प्रतियोगिता पुछारमा समाप्त गरेको थियो । यसबीच, आसिफ शेख लुम्बिनी लायन्समा आबद्ध भइसकेका छन् ।
जनकपुरले आसिफको स्थानमा ललित राजवंशीलाई मार्की खेलाडी बनाएको छ । पहिलो सिजन जनकपुरलाई च्याम्पियन बनाउन महत्वपूर्ण भूमिका खेलेका बायाँहाते स्पिनर ललितले १० खेलमा १७ विकेट लिएका थिए ।
हरमितले एनपिएलको पहिलो सिजनमा आठ विकेट लिनुका साथै पाँच खेलमा २८ रन बनाएका थिए । दोस्रो सिजनमा उनले नौ खेलमा १६६ भन्दा बढीको स्ट्राइक रेटमा १३३ रन बनाउनुका साथै ६.१८ को इकोनोमीमा १२ विकेट लिएका थिए ।
हरमितले अमेरिकाका लागि २९ एकदिवसीय अन्तर्राष्ट्रिय खेलमा ३९ विकेट तथा २९ ट्वान्टी-२० अन्तर्राष्ट्रिय खेलमा ३१ विकेट लिएका छन् ।
प्रतिक्रिया