सुर्खेत । कर्णाली प्रदेशमा आयोजना हुने दशौँ राष्ट्रिय खेलकुद प्रतियोगिताको मिति तय भएको छ।
राष्ट्रिय खेलकुद परिषद् (राखेप)को १२५औँ बोर्ड बैठकले प्रतियोगिता आगामी मंसिर १६ देखि २९ गतेसम्म सञ्चालन गर्ने निर्णय गरेको हो।
शिक्षा तथा खेलकुद मन्त्रालयमा बसेको बोर्ड बैठकले प्रतियोगिताको मिति निर्धारण गरेको हो । प्रतियोगिताको मिति निश्चित भएसँगै कर्णालीमा राष्ट्रिय खेलकुद आयोजना गर्ने तयारीले थप गति लिनेछ।
कर्णालीमा पहिलोपटक राष्ट्रियस्तरको ठूलो खेलकुद प्रतियोगिता आयोजना हुन लागेकाले यसलाई प्रदेशको खेलकुद विकासका लागि महत्वपूर्ण अवसरका रूपमा लिइएको छ।
त्यस्तै, राष्ट्रिय खेलकुद प्रतियोगिताका माध्यमबाट कर्णालीको पर्यटन तथा खेल पर्यटन प्रवर्द्धनमा समेत सकारात्मक प्रभाव पर्ने प्रदेश खेलकुद विकास परिषद्को विश्वास छ।
प्रतियोगितालाई व्यवस्थित र भव्य रूपमा सम्पन्न गर्न सम्बन्धित संघसंस्था तथा निकायसँग समन्वय गर्दै तयारी अघि बढाइने परिषद्ले जनाएको छ।
यसअघि विभिन्न कारणले दशौँ राष्ट्रिय खेलकुद प्रतियोगिताको आयोजनाको मिति पटक–पटक अन्योलमा पर्दै आएको थियो। पछिल्लो बोर्ड बैठकले मिति निश्चित गरेसँगै प्रतियोगिता आयोजनाको अन्योल हटेको छ।
प्रतिक्रिया