बुटवल । विशेष महाधिवेशनबाट बैधानिकता पाएर १५ औं महाधिवेशनमा जुटेको गगन थापा नेतृत्वमा रहेको नेपाली कांग्रेसका कतिपय जिल्लाहरुमा विशेष महाधिवेशनको विपक्षमा रहेकाहरुले पालिका स्तरको निर्वाचनमा जित हासिल गरेका छन् । रुपन्देहीको बिभिन्न स्थानीयतहमा विशेष महाधिवेनको विपक्षमा लागेका नेताहरुले पार्टीको आन्तरिक निर्वाचनमा सफलता हासिल गरेका हुन् ।
विशेष महाधिवेशन पछि गगन नेतृत्वमा खुलेका कांग्रेस नेता बालकृष्ण खाँणले रुपन्देहीका कतिपय स्थानीयतहमा सुरुदेखि गगनलाई साथ दिँदै आएका नेताहरुको विपक्षमा उम्मेदवारी दिएर जित आफ्नो पक्षमा पारेका छन् । खाँणले सिद्धार्थनगर, तिलोत्तमा, सुद्धोदनलगायतका पालिकाहरुमा गगन निकटका उम्मेदवारहरुलाई पराजित गर्दै आफु निकट उम्मेदवारहरुलाई जिताएका हुन् ।
रुपन्देहीमा पालिका नेतृत्वमा जितेका मध्य सिद्धार्थनगर नगरपालिकामा देवराज न्यौपाने, तिलोत्तमा नगरपालिकामा नारायण ढकाल र शुद्धोधनमा दामोदर पौडेल विशेष महाधिवेशनको विपक्षमा रहेर पछि मात्र गगन नेतृत्वको कांग्रेसमा समाहित भएका हुन् ।
पालिका अधिवेशनबाट बुटवल उपमहानगरपालिकाको सभापतिमा ज्योति भण्डारी, सैनामैना नगरपालिकामा विमल ज्ञवाली, देवदह नगरपालिकामा अमर लामिछाने भने निरन्तर गगन थापालाई सघाउँदै आएका नेताहरुमा पर्छन् । लुम्बिनी सांस्कृतिक नगरपालिकामा वीरेन्द्रबहादुर त्रिपाठी, मर्चवारीमा जनार्दन यादव सुरुदेखि गगनलाई साथ दिएका नेता हुन् । कञ्चनमा टेकबहादुर गुरुङ, गैडहवामा योगेन्द्रप्रसाद चौधरी, रोहिणीमा अकवाल खाँ पनि विशेष महाधिवेशन कै पक्षमा उभिएका नेता हुन् ।
सियारीमा सूर्यनारायण यादव, ओमसतियामा अखिलेश्वर पाण्डे, मायादेवीमा अकलेस यादव, कोटहीमाईमा राजेन्द्रप्रसाद यादव भने खाँण निकट नेताहरु हुन् । उनीहरुले गगन पक्षधर नेताका विरुद्ध उम्मेदवारी दिएर जित हासिल गरेका छन् ।
विशेष महाधिवेन असफल बनाउन कम्मर कसेर लागेका नेताहरु अहिले गगन थापाकै फोटो राखेर लगातार गगनलाई साथ दिएका नेताहरुका विरुद्ध उम्मेदवारी दिन आएको नाम नछाप्ने शर्तमा रुपन्देही कांग्रेसका एक नेताले बताए । संस्थापन समूहमा आएर यसैभित्र फुट पार्ने षडयन्त्र पनि हुन सक्ने ति नेताले अनुमान गरे ।
प्रतिक्रिया