काठमाडौं । सभामुख डोलप्रसाद (डीपी) अर्यालले प्रधानमन्त्री बालेन्द्र शाहलाई प्रतिनिधि सभामा उपस्थित भएर सांसदहरूले उठाएका प्रश्नको जवाफ दिन रुलिङ गरेका छन्।
सोमबार बसेको प्रतिनिधि सभाको बैठकमा विपक्षी सांसदहरूले प्रधानमन्त्रीले संसदमा उठेका प्रश्नको जवाफ नदिएसम्म बैठक अघि बढ्न नदिने अडान राख्दै विरोध जनाएपछि सभामुख अर्यालले प्रधानमन्त्रीलाई जवाफ दिन निर्देशन दिएका हुन्।
बैठकको सुरुआतमै विपक्षी सांसदहरू उठेर विरोध जनाएपछि सभामुख अर्यालले प्रधानमन्त्री वा प्रधानमन्त्रीको कार्यक्षेत्रसँग सम्बन्धित महत्त्वपूर्ण विषयमा प्रश्न–उत्तरको माग गर्दै भइरहेको विरोधप्रति आफ्नो ध्यानाकर्षण भएको बताए।
सभामुख अर्यालले प्रतिनिधि सभा नियमावली, २०८३ का नियम ५६, ५७, ५८, ५९ र ६० बमोजिम सांसदका प्रश्नको जवाफ दिन प्रधानमन्त्रीलाई निर्देशन दिए।
‘प्रतिनिधि सभाको बैठकमा उपस्थित भई नियमावलीको नियम ५६, ५७, ५८, ५९ र ६० बमोजिम माननीय सदस्यहरूको प्रश्नको जवाफ दिन म सम्माननीय प्रधानमन्त्रीलाई निर्देश गर्दछु,’ सभामुख अर्यालले भने।
विपक्षी सांसदहरूले प्रधानमन्त्री शाहले दिएको सीमासम्बन्धी विवादित अभिव्यक्ति सच्याउनुपर्ने मागसमेत गर्दै आएका छन्। यही विषयलाई लिएर संसदमा प्रश्न उठाउँदै विपक्षी दलहरूले प्रधानमन्त्रीबाट स्पष्ट जवाफ माग गरिरहेका छन्।
सभामुखको रुलिङपछि प्रधानमन्त्री शाहले प्रतिनिधि सभाको बैठकमा उपस्थित भएर सांसदका प्रश्नको जवाफ दिने अपेक्षा गरिएको छ।
प्रतिक्रिया