हेटौँडा । बागमती प्रदेशको मुख्यमन्त्रीमा नेकपा (एमाले)का किरण थापामगरले दाबी पेस गरेका छन्।
एमाले, नेपाली कम्युनिस्ट पार्टी (नेकपा) र राष्ट्रिय प्रजातन्त्र पार्टी (राप्रपा)को समर्थनमा थापाले बुधबार प्रदेश प्रमुख दीपकप्रसाद देवकोटासमक्ष मुख्यमन्त्रीमा दाबी पेस गरेका हुन्।
एमाले–नेकपा गठबन्धनबीच भएको भागबण्डाअनुसार बागमती प्रदेशको मुख्यमन्त्री एमालेको भागमा परेको थियो। एमालेले मंगलबार थापामगरलाई मुख्यमन्त्रीको उम्मेदवार बनाउने निर्णय गरेको थियो।
थापामगरले एमालेका २५, नेकपाका २६ र राप्रपाका १२ गरी कुल ६३ सांसदको समर्थनमा सरकार गठनको दाबी पेस गरेका हुन्। दाबी पेस गर्ने क्रममा एमाले संसदीय दलका नेता जगन्नाथ थपलिया, राप्रपा नेता उद्धव थापा र नेकपा संसदीय दलका नेता शालिकराम जम्कट्टेलले समर्थन पत्रमा हस्ताक्षर गरेका छन्।
कसैलाई समर्थन नगर्ने बताउँदै आएको राप्रपाले अन्तिममा थापालाई समर्थन गरेपछि सरकार गठनको बाटो खुलेको हो । १०४ सदस्यीय बागमती प्रदेशसभामा सरकार गठनका लागि बहुमतका लागि ५३ सांसद आवश्यक पर्छ। राप्रपाको समर्थनसँगै थापामगरको पक्षमा आवश्यक बहुमतभन्दा १० सांसद बढीको समर्थन जुटेको छ।
यसअघि मुख्यमन्त्री इन्द्रबहादुर बानियाँले पदबाट राजीनामा दिएपछि प्रदेश प्रमुख देवकोटाले संविधानको धारा १६८ को उपधारा (२) बमोजिम दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई मुख्यमन्त्रीमा दाबी पेस गर्न आह्वान गरेका थिए। दाबी पेस गर्ने समय भदौ ४ गते अपराह्न ४ बजेसम्म तोकिएको छ।
प्रतिक्रिया