नेपालगञ्ज । जिल्ला प्रहरी कार्यालय बाँकेले अदालतबाट फैसला भई सजाय तोकिएपछि फरार रहेका २२ प्रतिवादीलाई एक साताको अवधिमा पक्राउ गरेको छ ।
फैसला कार्यान्वयनलाई प्रभावकारी बनाउने उद्देश्यले सञ्चालन गरिएको अभियानअन्तर्गत प्रहरीले गत साउन २३ देखि २९ गतेसम्म जिल्लाका विभिन्न स्थानबाट उनीहरूलाई पक्राउ गरेको हो । जिल्ला प्रहरी कार्यालय बाँकेका सूचना अधिकारी एवं प्रहरी नायब उपरीक्षक प्रतितसिंह राठौरका अनुसार पक्राउ परेका प्रतिवादीबाट कुल रु एक लाख ६७ हजार जरिवाना असुल गरिएको छ ।
उनले भने, “अदालतबाट फैसला भई सजाय तोकिएर पनि फरार रहेका प्रतिवादीको खोजी तथा पक्राउ अभियानलाई प्रहरीले निरन्तरता दिइरहेको छ । पक्राउ परेकाहरूबाट जरिवाना असुल गरी फैसला कार्यान्वयनका लागि अदालतमा बुझाइएको छ ।”
उनका अनुसार पक्राउ परेका २२ प्रतिवादीलाई अदालतले कुल चार वर्ष एक महिना १५ दिन कैद सजाय तोकेको थियो । पक्राउ परेका सबैलाई फैसला कार्यान्वयनका लागि सम्बन्धित अदालतमा बुझाइएको प्रहरीले जनाएको छ । जिल्ला प्रहरी कार्यालय बाँकेले अदालतबाट फैसला भई फरार रहेका प्रतिवादीको खोजी तथा पक्राउ अभियान गत वर्षदेखि नै निरन्तर सञ्चालन गर्दै आएको छ ।
फैसला कार्यान्वयनमा प्रहरीको सक्रियता बढेसँगै फरार प्रतिवादी पक्राउ पर्ने क्रमसमेत बढेको जिल्ला प्रहरी कार्यालय बाँकेका प्रमुख प्रहरी उपरीक्षक अङ्गुर जिसीले बताए । उनका अनुसार अदालतबाट विभिन्न मुद्दामा दोषी ठहर भई सजाय तोकिए पनि फरार रहेका कतिपय व्यक्ति आपराधिक तथा गैरकानुनी गतिविधिमा संलग्न हुने गरेको पाइएकाले उनीहरूको खोजी तथा पक्राउ अभियानलाई प्राथमिकता दिइएको छ ।
प्रतिक्रिया