रुपन्देही । रुपन्देही प्रहरीले पेस्तोल र चार राउन्ड गोलीसहित एक जनालाई पक्राउ गरेको छ । पक्राउ पर्नेमा सियारी गाउँपालिका-२ का करिब ४४ वर्षीय अजय चौधरी रहेका छन् ।
प्रहरीका अनुसार चौधरीले नक्कली ब्लुबुक तयार गरी चोरीका मोटरसाइकल खरिद-बिक्री गर्ने गरेको सूचनाका आधारमा निगरानी बढाइएको थियो । सोही क्रममा जिल्ला प्रहरी कार्यालय रुपन्देहीबाट सादा पोसाकमा खटिएको प्रहरी टोलीले उनलाई सिद्धार्थनगर नगरपालिका-७, विद्यापथबाट नियन्त्रणमा लिएको हो ।
चेकजाँचका क्रममा चौधरीको साथबाट टाइप-५४ पेस्तोलजस्तो देखिने एक थान पेस्तोल र त्यसमा लोड गरिएको चार राउन्ड गोली बरामद भएको प्रहरीले जनाएको छ ।
त्यस्तै, उनको साथबाट एउटै फोटो भएका दुईवटा ब्लुबुक र चारवटा भारतीय आधार कार्डसमेत फेला परेको प्रहरीले जनाएको छ ।
प्रहरीका अनुसार चौधरीले नक्कली ब्लुबुक तयार गरी चोरीका मोटरसाइकल बेचबिखन गर्ने गरेको प्रारम्भिक अनुसन्धानबाट खुलेको छ ।
पक्राउ परेका चौधरीलाई जिल्ला प्रहरी कार्यालय रुपन्देहीमा ल्याई पेस्तोल, गोली तथा नक्कली कागजातसम्बन्धी घटनाबारे थप अनुसन्धान भइरहेको प्रहरीले जनाएको छ ।
प्रतिक्रिया