चितवन । चितवनको देवघाटस्थित नारायणी नदीमा जलसतह खतराको तहभन्दा माथि पुगेको छ । लगातारको वर्षाका कारण नारायणीमा जलसतह बढ्दै गएपछि नदी आसपासका तल्लो क्षेत्रका बस्तीमा कटान तथा डुबानको जोखिम बढेको हो ।
नारायणी नदीमा ७ दशमलव ३ मिटर जलसतह पुगेपछि चेतावनी तह पार हुने भए पनि अहिले जलसतह निरन्तर बढिरहेको जनाइएको छ । जलसतह बढेसँगै भरतपुर महानगरपालिका-१७ र २८ अन्तर्गतका नदी तटीय क्षेत्रका केही बस्तीमा पानी पस्न थालेको छ ।
जोखिम बढेपछि नदी आसपासका बस्तीका स्थानीयवासीलाई सुरक्षित स्थानतर्फ जान आग्रह गरिएको छ । नदीको बहाव उच्च रहेकाले तटीय क्षेत्रमा बसोबास गर्ने नागरिकलाई विशेष सतर्कता अपनाउन आग्रह गरिएको छ ।
यसैगरी, चितवनको बनकट्टास्थित रिउ खोलामा पनि जलसतह ४ दशमलव ६२ मिटर पुगेको छ । रिउ खोलामा ३ दशमलव ४० मिटरलाई चेतावनी तह र ३ दशमलव ८० मिटरलाई खतराको तह मानिन्छ । जलसतह केही घटेको भए पनि अहिले पनि खतराको सीमाभन्दा माथि नै रहेको जनाइएको छ ।
नारायणी नदी र रिउ खोलामा पानीको बहाव उच्च रहेकाले नदी तथा खोला किनारका बासिन्दालाई विशेष सतर्कता अपनाउन र जोखिम देखिए सुरक्षित स्थानमा जान जल तथा मौसम विज्ञान विभागले आग्रह गरेको छ ।
नारायणी नदीमा बाढी बढेसँगै पश्चिम चितवनका नदी तटीय बस्तीमा बाढी पस्ने सम्भावना पनि बढेको छ । चितवन प्रहरी प्रमुख प्रहरी उपरीक्षक रामेश्वर पौडेलले नदी तटीय क्षेत्रका बासिन्दालाई सतर्क रहन आग्रह गरिएको जानकारी दिए ।
चितवनमा रातभर वर्षा भएको र वर्षा जारी रहेकाले नदी तथा खोलाको जलसतह थप बढ्न सक्ने जोखिम रहेको जनाइएको छ ।
प्रतिक्रिया