काठमाडौं । साताको पहिलो कारोबार दिन सोमबार सेयर बजार परिसूचक नेप्से १६ अंकभन्दा बढीले घटेको छ । यस दिन नेप्से परिसूचक १६.४७ अंक अर्थात् ०.६२ प्रतिशतले घटेर २ हजार ६१३.३३ विन्दुमा झरेको छ ।
बजार घटे पनि सोमबार कारोबार रकम भने ५ अर्ब रुपैयाँभन्दा माथि रहेको छ । नेपाल स्टक एक्सचेन्ज (नेप्से)का अनुसार ३५७ धितोपत्रको ५८ हजार ५ सय कारोबारबाट १ करोड ३१ लाख ७८ हजार १ सय २८ कित्ता सेयर किनबेच भएका छन् । यसबाट कुल ५ अर्ब ३८ करोड ५७ लाख ८५ हजार ४ सय १४ रुपैयाँ बराबरको कारोबार भएको छ ।
सोमबार ट्रेडिङ समूहको उपसूचक मात्रै ०.२३ प्रतिशतले बढेको छ । बाँकी १२ वटा उपसूचक घटेका छन् । सबैभन्दा धेरै निर्जीवन बीमा समूहको उपसूचक १.२० प्रतिशतले घटेको छ ।
कारोबार भएका कम्पनीमध्ये २२३ वटा कम्पनीको सेयर मूल्य घट्दा ५० कम्पनीको मूल्य बढेको छ । बाँकी धितोपत्रको मूल्यमा भने उल्लेख्य परिवर्तन देखिएन ।
मूल्य बढ्नेमा केबीएल डिभेन्चर अगाडि रहेको छ । यसको मूल्य १२.१७ प्रतिशतले बढेको छ । त्यस्तै, लक्ष्मी सनराइज डिभेन्चरको मूल्य १० प्रतिशत तथा प्राइम बैंक डिभेन्चरको मूल्य ८.८३ प्रतिशतले बढेको छ ।
यता, हाथवे इन्भेस्टमेन्ट नेपाल लिमिटेडको सेयर मूल्य सर्वाधिक १०.५८ प्रतिशतले घटेको छ । इमर्जिङ नेपाल लिमिटेड, ग्लोबल आईएमई ब्यालेन्स्ड फन्ड, धौलागिरि लघुवित्त वित्तीय संस्थालगायतका धितोपत्रको मूल्यमा पनि उल्लेख्य गिरावट आएको छ ।
सोमबार हिमालयन डिस्टिलरीको सबैभन्दा धेरै रकम बराबरको कारोबार भएको छ भने हाथवे इन्भेस्टमेन्ट नेपाल लिमिटेडको सबैभन्दा धेरै पटक कारोबार भएको नेप्सेले जनाएको छ ।
प्रतिक्रिया