काठमाडौं । नेकपा (एमाले) संसदीय दलका नेता रामबहादुर थापा ‘बादल’ले प्रधानमन्त्री वालेन्द्र शाह नेतृत्वको सरकार फाँसीवादी बाटोमा अघि बढेको आरोप लगाएका छन् । उनले सरकारले जनताको जनजीवनसँग जोडिएका समस्याको समाधानमा ठोस उपलब्धि हासिल गर्न नसकेको टिप्पणीसमेत गरेका छन् ।
शुक्रबार बसेको प्रतिनिधिसभा बैठकमा समय लिएर बोल्दै नेता थापाले सरकारको कार्यशैलीप्रति असन्तुष्टि व्यक्त गर्दै पूर्वप्रधानमन्त्री केपी शर्मा ओलीको गिरफ्तारीबाट सरकारले फाँसीवादी शासनको यात्रा सुरु गरेको दाबी गरे ।
‘वालेन्द्र सरकारले फाँसीवादी शासनको ६ महिना पार गरेको छ । यो यात्रा पूर्वप्रधानमन्त्रीको गिरफ्तारीबाट सुरु भएको थियो । अहिले पूर्वप्रधानन्यायाधीशको कलाविहीन नाटक मञ्चनसम्म आइपुगेको छ,’ उनले भने ।
उनले आगामी दिनमा पूर्वसभामुख वा अन्य प्रमुख राजनीतिक नेतासमेत पक्राउ पर्न सक्ने आशंका व्यक्त गरे । ‘क–कसको पछाडि सुराकी खटाइएको छ रु निकट भविष्यमा मध्यरातमा कुनै पूर्वसभामुख, कुनै प्रमुख नेता गैरकानुनी ढंगबाट पक्राउ पर्नु अनौठो हुनेछैन,’ थापाले टिप्पणी गरे ।
सम्पत्ति शुद्धीकरणको लोकप्रिय आवरणमा देशभक्त तथा लोकतान्त्रिक शक्तिलाई समाप्त पार्ने प्रयास भइरहेको उनको आरोप थियो । फाँसीवाद लोकतन्त्रको विपरीत ध्रुव भएको उल्लेख गर्दै उनले यस्तो शासन व्यवस्थाले विधिको शासनलाई स्वीकार नगर्ने बताए ।
सरकारले विश्वव्यापी रूपमा देखिएका विभिन्न संकट र नेपालका आन्तरिक समस्याको समाधानका लागि प्रभावकारी पहलकदमी लिन नसकेको पनि थापाको भनाइ थियो । जनताको दैनिक जीवनसँग प्रत्यक्ष जोडिएका विषयमा सरकारले अपेक्षित परिणाम दिन नसकेको उनले बताए ।
गत फागुन २१ गते सम्पन्न निर्वाचनमा एमालेले व्यहोरेको पराजयलाई स्वीकार गरिएको उल्लेख गर्दै उनले त्यसलाई आत्मसमर्पण नभई राजनीतिक सिकाइका रूपमा लिने स्पष्ट पारे ।
त्यसैगरी, पर्याप्त आधारबिना पूर्वउच्चपदस्थ व्यक्तिहरूलाई पक्राउ गरिएको भन्दै उनले आपत्ति जनाए । सुशासन र पारदर्शिताको प्रतिबद्धतासहित अघि बढेको सरकारले आफ्नै घोषणाअनुसार काम गर्न नसकेको उनको आरोप थियो ।
प्रतिनिधिसभा बैठकमा नेता थापाले सरकारको राजनीतिक कार्यशैली, पक्राउसम्बन्धी निर्णय र जनजीविकाका सवालमा उठाएका विषयले सरकारप्रति एमालेको असन्तुष्टि संसद्मा प्रस्तुत गरेका छन् ।
प्रतिक्रिया